Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 124 Hüküm no: 50 Orijinal metin no: [9a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan v. Şirvan’ın Divriği kasabındaki bağını Hobyar v. Agop’a sattığı Vilâyet-i Anadolu’da Divriği kasabası sâkinlerinden Sinan v. Şirvan nâm zimmî meclis-i şer‘-i hatîr-i lâzimü’t-tevkīrde işbu bâ‘isü’s-sifr Hobyar v. Agop nâm zimmî muvâcehesinde ikrâr ve takrîr-i kelâm edip zikri âtî akdin sudûruna değin silk-i mülkümde münselik olup kasaba-i mezbûre sınırında vâki‘ bir tarafı Yahya Bey b. Süleyman Bey mülkü ve bir tarafdan Vartan v. Vorihed? mülkü ve bir tarafı Piro v. Grab mülkü ve bir tarafı tarîk-ı âm ile mahdûd bir bâb odayı müştemil mülk bağımı kâffe-i hukūk ve merâfıkı ve âmme-i tevâbi‘ ve levâhıkı ile yüz on kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Hobyar’a bey‘ edip ol dahi iştirâ ve kabûl eyledikden sonra semini olan yüz on kıt‘a riyâlî guruşa mezbûr Hobyar yedinden bi’t-tamâm ve’l-kemâl ahz u kabz edip zikrolunan bağı mahallinde zabta merkūm Hobyar’ı taslît eyledim dedikde mukırr-ı merkūm Sinan’ın vech-i muharrer üzere cârî ve sâdır olan ikrârın el-mukarru lehü’l-mesfûr Hobyar bi’l-müvâcehe tasdîk etmeğin mâ-vaka‘a bi’t-taleb ketb olundu. Tahrîren fi’l-yevmi’r-râbi‘ aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Manuk v. Malkom, Gazel v. Şehab, İstestor v. Asador, Şirvan v. Asador, Avanos v. Kiragos ve gayruhüm mine’l-[hâzırîn.]