Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 133 Hüküm no: 62 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Handan Hatun bt. Abdulmennan’ın kocası Hüseyin Ağa b. Ali’den boşandığı (Muhâla‘a) Fazîletlü efendi hazretlerinin imzâsıyladır. Husûs-ı âti’l-beyânın mahallinde tahrîri iltimâs olunmağın savb-ı şer‘den Mevlânâ Mehmed Efendi b. Veli Efendi irsâl olunup ol dahi mahmiye-i İstanbul’da Sarı Nasûh mahallesinde vâki‘ olup Muameleci Halil oğlu Mustafa Çelebi’nin menziline varıp zeyl-i kitâbda mastûru’l-esâmi olan Müslimîn huzûrunda akd-i meclis-i şer‘-i hatîr etdikde mezkûr Mustafa Çelebi’nin vâlidesi olan zübdetü’l-muhadderât Handan Hâtun bt. Abdülmennân meclis-i ma‘kūd-ı mezkûrda zevc-i dâhil-bihâsı sâhibü hâze’l-kitâb Hüseyin Ağa b. Ali mahzarında tav‘an ikrâr ve i‘tirâf edip zevcim merkūm Hüseyin Ağa ile nikâhım ma‘kūd olup zimmetinde mütekarrir olan yüz kıt‘a riyâlî guruş mehr-i müeccelim üzerine ve nafaka-i iddet-i mu‘ayyene ve meûnet-i süknâm üzerine zevcim merkūm Hüseyin Ağa’nın benden mütevellide olan sagīre kızı işbu Âişe’nin târih-i kitâbdan on beş sene tamâmına değin bilâ-nafaka ve lâ-kisve terbiye etmek üzerine muhâla‘a-i sahîha-i şer‘iyye ile muhâla‘a edip herbirimiz âharın zimmetini zevciyyete ve gayra müte‘allika âmme-i hukūk-ı ma‘lûme da‘vâsından ibrâ-i âmm-ı kātı‘u’n-nizâ‘la ibrâ ve ıskāt eyledik dedikde mezkûr Hüseyin Ağa dahi muhâla‘a-i mezkûre-i meşrûhayı kabûl ve kelimât-ı mezkûrede merkūme Handan Hâtun’u bi’l-müvâcehe tahkīk ve bi’l-müşâfehe tasdîk ettiğini mevlânâ-yı mezkûr mahallinde tahrîr ve ba‘dehû meclis-i şer‘-i hatîr-i lâzimü’t-tevkīre gelip vâki‘-i hâli vukū‘u üzere ihbâr ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâlis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ahmed Çavuş b. Hızır, Receb Bey b. Kayasultan, İsa Bey b. Ahmed ve gayruhüm.