Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 132 Hüküm no: 61 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sipahi Mehmed Ağa’nın Sinop kasabası ile Karasu ve Kızılcaelma nahiyeleri ahalisine kalyon inşası için satılan kereste bedelinden borcu olduğu Vilâyet-i Anadolu’da Karadeniz sâhiline vâki‘ nefs-i Sinob kasabası sükkânından olup kendi kıbelinden asîl ve sâir ahâlî-i kasaba-i mezbûreden ma‘lûmü’l-esâmi kimesneler taraflarından husûs-ı âti’l-beyâna vekâlet-i âmme-i mutlaka ile vekîl olduğu hüccet-i şer‘iyye ile sâbit olan Mahbûb Sofu b. Habib ve kazâ-i mezbûr muzâfâtından Karasu nâhiyesinden olup kendi kıbelinden asîl ve sâir ahâlî-i nâhiye-i mezbûreden kezâlik vekâlet-i âmme-i mutlaka ile vekîli olduğu hüccet-i şer‘iyye ile sâbit olan Abdülkadir Fakih b. Ahmed ve yine kazâ-i mezbûr tevâbi‘inden Kızılcaelma nâhiyesi sükkânından olup kendi kıbelinden asîl ve sâir ahâlî-i nâhiye-i mezbûre taraflarından kezâlik vekâlet-i âmme-i mutlaka ile vekîl olduğu hüccet-i şer‘iyye ile sâbit olan Receb b. Şükrullah nâm kimesneler meclis-i şer‘-i hatîr-i lâzimü’t-tevkīrde Dergâh-ı âlî dâme mahfûfen bi’l-me‘âlî kapıcıbaşılarından olan fahrü’l-emâcid ve’l-ekârim câmi‘u’l-mehâmid ve’l-mekârim sâhibü hâze’l-kitâb Sipâhî Mehmed Ağa b. ( ) tarafından ikrâr-ı âti’l-beyânı tasdîka vekîl olup vekâleti şer‘an sâbite olan mefharü’l-emâsil Ahmed Çavuş b. Oruc nâm kimesne mahzarında herbiri bi’l-asâle ve bi’l-vekâle tav‘an ikrâr ve i‘tirâf edip işbu târih-i kitâb senesinde zikrolunan Sinob kazâsı ahâlîsi üzerlerine Sinob İskelesi’nde binâsı fermân olunan kalyon ta‘bîr olunan iki pâre sefînenin binâsına müvekkil-i mûmâ-ileyh Sipâhî Mehmed Ağa taraf-ı aliyye-i şehriyârîden mübâşir ta‘yîn olunmağla mûmâ-ileyh Sipâhî Mehmed Ağa kasaba-i mezbûreye gelip bâ-fermân-ı şehriyârî zikrolunan iki pâre sefineyi binâ ve itmâm edip lâkin kānûn-ı kadîm üzere yedinde olan liman defterinde derc ve tahrîr olunduğu üzere mîrîden bize verilegelen kerestenin semenini tamâmen edâ ve teslîm etmeyip noksânı ile hesâb ve teslîm etmekle hâlâ zafer bulup zikrolunan noksân-ı kül mûmâ-ileyh Mehmed Ağa’dan taleb eylediğimizde mûmâ-ileyh Mehmed Ağa dahi tamâmen edâ ettim deyu iddiâ edip ba‘de’n-nizâ‘ yedinde olan liman defteri mûcebince kendiye teslîm ettiğimiz kerestenin semenini tekrar hesâb eylediğimizde mûmâ-ileyh Mehmed Ağa üzerinde on bir bin râyic [fi’l]-vakt akçe zuhûr edip taleb ettiğimizde mûmâ-ileyh Mehmed Ağa cevâbında liman defteri üzere zikrolunan sefînelerin binâsına bâ-fermân bana teslîm ettiğin kerestenin mecmû‘-ı semenlerini bi’t-tamâm size bi’d-defe‘ât teslîm eyledim üzerimde bâkī hakkınız kalmamışdır demekle beynimizde münâza‘ât-ı kesîre ve muhâsamât-ı şedîde vâkı‘a olmuşidi el-hâletü hâzihî beynimize muslihûn tavassut edip müvekkil-i mûmâ-ileyh Mehmed Ağa ile bizi zikrolunan on bir bin akçe da‘vâsından altı bin râyic [fi’l]-vakt akçe üzerine sulh eylediklerinden biz dahi sulh-ı mezbûru kabûl ve bedel-i sulh olan meblağ-ı merkūm altı bin akçeyi müvekkil-i mûmâ-ileyh Mehmed Ağa yedinden meclis-i sulhda vekâlet-i mahkiyemiz ve asâletimiz hasebiyle tamâmen ahz u kabz edip da‘vâ-yı mezkûreden mezbûr Mehmed Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik min ba‘d müvekkil-i mûmâ-ileyh Mehmed Ağa üzerine zikrolunan meblağ-ı bâkīye ve sâir hukūk-ı ma‘lûmeye müte‘allika bi-vechin mine’l-vücûh ve sebebin mine’l-esbâb da‘vâ ve hakkımız kalmadı dediklerinde mukırrûn-ı mezbûrûnu minvâl-i meşrûh üzere bi’l-asâle ve bi’l-vekâle cârî ve sâdır olan ikrârlarında vekîl-i merkūm dahi bi’l-müvâcehe tahkīk ve bi’l-müşâfehe tasdîk edicek mâ-hüve’l-vâki‘ bi’t-taleb ketb olundu, men lehü’t-taleb yedine def‘ olundu. Fi’l-yevmi’s-sâlis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ahmed Çavuş b. ( ), Hasan Çavuş b. ( ), Yusuf Çavuş b. ( ), Şa‘ban b. Süleyman, Hasan Efendi b. ( ), Süleyman Bey b. ( ), Mahmud Çelebi b. ( ), Ahmed Bey b. ( ).