Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 142 Hüküm no: 74 Orijinal metin no: [12b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarac Yanaki v. Hıristo’nun Rus asıllı cariyesi Anna bt. Yuvan’ı azat ettiği Mahmiye-i İstanbul’da Abdi Subaşı mahallesinde sâkin olan Sarac Yanaki v. Hıristo nâm zimmî meclis-i şer‘-i hatîr-i lâzimü’t-tevkīrde tav‘an ikrâr ve i‘tirâf edip zikri âtî i‘tâkın sudûruna değin silk-i mülk-i sahîhimde münselik olup bana rıkkını mu‘terife olan orta boylu sarı benizli açık kaşlı Rusiyyetü’l-asl Nasrâniyetü’l-mille sağ elinin baş parmağında eser-i cerhi olan câriye-i memlûkem Anna bt. Yuvan nâm Nasrâniyeyi tahfîfen li-azâbi’n-nîrân tahrîr ve i‘tâk edip silk-i harâir-i asliyyâta ilhâk eyledim min ba‘d merkūme Anna sâir harâir-i asliyyât gibi hürre olup üzerinde mevâlî için utekā üzerlerinde olan hakk-ı velâdan gayrı alâka ve hakkım kalmadı dedikde mukırr-ı mezbûrun vech-i meşrûh üzere cârî ve sâdır olan ikrârı bi’t-taleb ketb ve imlâ olunup men lehâ’t-taleb yedine def‘ ve i‘tâ olundu. Fi’l-yevmi’s-sâmin aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ahmed b. Halil, İbrahim b. Abdullah, Hasan b. Pîrî, Osman b. Süleyman, Şa‘ban b. Mehmed, Bâkī b. Hüseyin.