Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 141 Hüküm no: 73 Orijinal metin no: [12b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Çavuş b. Abdurrahman’ın Karabaş mahallesindeki menzilini Ali Beşe b. İlyas’a kırk yedi bin akçeye sattığı Mahmiye-i İstanbul’da Yenibahçe kurbünde Karabaş mahallesi ahâlîsinden fahrü’l-akrân İbrahim Çavuş b. Abdurrahman meclis-i şer‘-i hatîr-i lâzimü’t-tevkīrde işbu râfi‘ü’l-kitâb Ali Beşe b. İlyas mahzarında tav‘an ikrâr ve i‘tirâf edip zikri âtî akdin sudûruna değin silk-i mülkümde muntazam yedimde mülk ve hakkım olup mahalle-i mezkûrede vâki‘ bir tarafdan Mahmud Çelebi mülküne ve bir tarafdan Hadice Hâtun mülküne ve bir tarafdan bazen Ali Çelebi mülküne ve bazen Abdurrahman nâm kimesne mülküne ve bir tarafdan tarîk-ı âmma müntehî olup dâhiliyesi üç bâb tahtânî odayı ve cüneyne ve kenîfi ve hâriciyesi bir bâb fevkānî ve bir bâb tahtânî odaları ve bir su kuyusunu ve zât-ı eşcâr-ı müsmire ve gayr-ı müsmireyi hâvî bahçeyi ve kenîfi müştemil olan cemî‘ mülk menzilimi kâffe-i hukūk ve merâfıkıyla mezbûr Ali Beşe’ye kırk yedi bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzere iştirâ ve tesellüm eyledikden sonra semeni olan meblağ-ı mezkûr kırk yedi bin akçeyi mezkûr Ali Beşe yedinden bi’t-tamâm ahz u kabz eyledim ba‘de’l-yevm menzil-i mahdûd-ı mezkûr mezbûr Ali Beşe’nin mülk-i müşterâsı ve hakk-ı sırfıdır keyfe mâ yeşâ ve yahtâr mutasarrıf olsun dedikde mukırr-ı mezbûr İbrahim Çavuş’u vech-i muharrer üzere cârî ve sâdır olan ikrârında el-mukarru lehü’l-mezkûr Ali Beşe vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâmin aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ramazan Efendi b. Mehmed el-imâm, Abdurrahman Efendi b. eş-Şeyh Ahmed el-imâm, Salih Efendi b. Abdünnebî el-imâm, el-Hâc Mustafa Çelebi b. el-Hâc Ali, el-Hâc Mehmed b. Hasan, Hasan Beşe b. Ali, Abdullah Çelebi b. Ramazan el-müezzin ve gayruhüm mine’l-[hâzırîn.]