Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 143 Hüküm no: 76 Orijinal metin no: [12b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Ali’nin gizlice eşyasını aldığı iddiasıyla boşandığı karısı Handan bt. Abdülmennan aleyhine açtığı davada iddiasını ispat edemediği Mahmiye-i İstanbul’da Sarı Bayezid mahallesi sükkânından olan Hüseyin Ağa b. Ali meclis-i şer‘-i hatîrde zevce-i mutallakası olan sâhibetü hâze’l-kitâb Handan bt. Abdülmennân nâm hâtun tarafından zikri âtî husûmete vekîl olup vekâleti şer‘an sâbite olan Şamî Ömer Bey mahzarında üzerine takrîr-i da‘vâ edip merkūme Handan Hâtun ile muhâla‘a edip beynimizde beynûnet vâkı‘a oldukda merkūmenin menzilinden nakl üzere iken müvekkile-i merkūme Handan Hâtun elli beş riyâlî guruş kıymetli iki tâne zer-bâb Acem kumaşımı sandığımdan hufyeten ahz eylemişdir suâl olunup aynıları mevcûd ise aynılarını mevcûd değiller ise yevm-i istihlâkinde kıymet-i meşrûhalarını bana teslîm eylemesi için müvekkile-i merkūme Handan Hâtun için vekîl-i merkūm Ömer Bey’e savb-ı şer‘-i enverden tenbîh olunması matlûbumdur dedikde gıbbe’s-suâl ve akībe’l-inkâr ve ba‘de talebi’l-beyyine merkūm Hüseyin Ağa ityân-ı beyyineden izhâr-ı aczle merkūme Handan Hâtun’a zikrolunan kumaşları vech-i muharrer üzere ahz ve ketm etmediğine yemîn vermek murâd edip lâkin tahakkuk-ı özr-i şer‘î ile merkūme Handan Hâtun’un meclis-i şer‘a huzûru müte‘azzir olmağın savb-ı şer‘den li-ecli’t-tahlîf Mevlânâ Mehmed Efendi b. Veli Efendi ile huddâm-ı şer‘den İsa Bey b. Ahmed ve Osman Beşe b. Sevindik irsâl olundukda mevlânâ-yı mezkûr dahi müvekkile-i merkūmenin mahalle-i mezbûrede vâki‘ menziline varıp merkūme Handan Hâtun’a müdde‘î-i merkūm Hüseyin Ağa muvâcehesinde zikrolunan zer-bâb kumaşları merkūm Hüseyin Ağa’nın sandığından ahz ve ketm etmediğine (…) üzerinde ve kıbelinde müdde‘î-i merkūm Hüseyin Ağa’nın hakkı olmadığına yemîn teklîf etdikde merkūme Handan [13a] Hâtun dahi alâ vefki’l-mes’ûl yemîn billâhi’l-aliyyi’l-a‘lâ etdikde vâki‘-i hâli mevlânâ-yı mezbûr mahallinde tahrîr ve ba‘dehû meclis-i şer‘a gelip mezbûrân ile ma‘an vukū‘u üzere haber verdiklerinde mâ-hüve’l-vâki‘ bi’t-taleb ketb olunup men lehü’t-taleb yedine def‘ olundu. Fi’l-yevmi’s-sâlis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ahmed Çavuş b. Hızır el-cündi, Osman Beşe b. Abdullah, Receb Bey b. ( ) teberdâr, Ömer Ağa b. Ebîbekir, İbrahim Ağa b. ( ) teberdâr, Hüseyin Bey b. ( ), Mustafa Bey b. Mehmed ve gayruhüm.