Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 143 Hüküm no: 77 Orijinal metin no: [13a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mehmed’in Rabia bt. Mustafa’ya doksan beş guruş borcu olduğunu ikrar ettiği Mahmiye-i İstanbul’da Camcı mahallesinde sâkine işbu râfi‘atü’l-kitâb Râbia bt. Mustafa nâm hâtun mahfil-i kazâda mahalle-i mezbûre sâkinelerinden Âişe bt. Mehmed nâm hâtun mahzarında üzerine da‘vâ ve takrîr-i kelâm edip merkūme Âişe zimmetinde yedimden müşterâ ve makbûz adedi beynimizde ma‘lûm gömlek ve don semeninden altmış kıt‘a riyâlî guruş ve cihet-i karz-ı şer‘îden otuz beş kıt‘a riyâlî guruş ki cem‘an doksan beş kıt‘a riyâlî guruş hakkım vardır hâlâ taleb ederin suâl olunsun dedikde gıbbe’s-suâl merkūme Âişe cevâbında vech-i muharrer üzere adedi beynimizde ma‘lûm gömlek [ve] don semeninden altmış kıt‘a riyâlî guruş ve cihet-i karz-ı şer‘îden otuz beş kıt‘a guruş ki cem‘an doksan beş kıt‘a riyâlî guruş müdde‘iye-i merkūmeye zimmetimde lâzimü’l-edâ ve vâcibü’l-kazâ deynim vardır deyu bi-tav‘ihâ ikrâr ve i‘tirâf etmeğin mûcebince meblağ-ı mezbûr doksan beş kıt‘a riyâlî guruşu müdde‘iye-i merkūme Râbia’ya edâ ve îfâya merkūme Âişe’ye tenbîh birle mâ-vaka‘a bi’t-taleb ketb olundu. Fi’l-yevmi’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mehmed Efendi el-kādî, Mustafa Efendi el-kādî, İbrahim Bey b. Ahmed, Osman Beşe çukadâr ve gayruhüm mine’l-[hâzırîn.]