Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 148 Hüküm no: 83 Orijinal metin no: [13b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Veli Bey’in reşit oluncaya kadar vasisi olan Piri Çelebi b. İbrahim zimmetinde sekiz bin akçe alacağı olduğu Mahmiye-i İstanbul’da Emin Sinan mahallesi sâkinelerinden Rahime bt. Veli Bey nâm bikr-i bâliğa meclis-i şer‘-i hatîrde mahalle-i mezbûre sükkânından Pîrî Çelebi b. İbrahim nâm râcil mahzarında üzerine takrîr-i da‘vâ edip babam mezbûr Veli Bey vefât etdikde verâseti zevceleri İsmihan bt. Abdülkerim ve Ünzile bt. Receb nâm hâtunlara ve validesi Rahime bt. Ca‘fer nâm hâtuna ve li-ebeveyn er karındaşı Mehmed’e ve kız karındaşı Zübeyde nâm hâtuna münhasıra oldukda ben sagīre olduğum ecilden mezbûr Pîrî Çelebi tesviye-i umûruma savb-ı şer‘den vasî nasb olunmağla babam müteveffâ-yı mezbûrun cemî‘ terekesini verese-i mezkûrun asâleten ve merkūm Pîrî Çelebi vesâyeten ma‘rifet-i kassâm-ı askerî ile kabz ve bey‘ eyledi hâsıl olunan semenlerinden zevceleri mezbûretânın mehr-i müeccel haklarını ve sâir düyûn-ı müsbetesini edâ ve masârıf-ı lâzımesini ihrâc ettikden sonra bâkī kalan meblağdan ber-mûceb-i defter-i kassâm verese-i mezbûrûndan herbiri hisselerini ahz u kabz edip benim hisseme isâbet eden on dört bin üç yüz seksen dokuz akçe hakk-ı mevrûsumu dahi mezbûr Pîrî Çelebi vesâyeten kabz [edip] dört sene mürûrunda vâlidem olup işbu hâzıratü bi’l-meclis olan ( ) nâm hâtun mezbûr Pîrî Çelebi üzerine hasbî nâzıra olmağla mezbûr Pîrî Çelebi’nin Müslimîn huzûrunda dört senelik muhâsebesin gördükde ba‘de’l-hesâb merkūm Pîrî Çelebi üzerinde asl-ı mâl-ı merkūmdan ve dört senede i‘mâli ile hâsıl olan ribhinden cem‘an yirmi bin üç yüz seksen dokuz akçe olup meblağ-ı mezbûrdan nafaka-i mefrûzam ve kavli üzere sâir masârıf-ı müteferrikası ba‘de’l-ihrâc merkūm Pîrî Çelebi üzerinde sekiz bin râyic [fi’l]-vakt akçe zuhûr edip kendiden meblağ-ı mezbûrun mahalli suâl olundukda merkūm Pîrî Çelebi cevâbında meblağ-ı mezbûr sekiz bin akçeyi masârıfima sarfım ile hâlâ zimmetimde vâcibü’l-edâ deynimdir deyu meblağ-ı mezbûrun zimmetinde deyn olduğuna Müslimîn huzûrunda gıbbe’l-işhâd ve i‘tirâf dahi etmişdir hâlâ bâliğa ve reşîde olduğum cihetden meblağ-ı mezbûr sekiz bin akçemi merkūm Pîrî Çelebi’den taleb ederim suâl olunsun dedikde gıbbe’s-suâl merkūm Pîrî Çelebi cevâbında müdde‘iye-i merkūme Rahime için babası terekesinden on dört bin üç yüz seksen dokuz akçesini ba‘de’l-kabz dört sene i‘mâli ile cem‘an yirmi bin üç yüz seksen dokuz akçe olup meblağ-ı mezbûrdan on altı bin iki yüz akçesini nafaka-i mefrûzasına sarf edip ve iki bin akçesini tereke-i müteveffâ-yı mezbûrdan bazı eşyâ acele ile bey‘ olunmakda mezbûre Rahime’ye [zarar-ı] beyyini olmağla re’y-i hâkimü’ş-şer‘le iki bin akçe kıymet takdîr olunup alâ mehlin bey‘ olunmak için bana teslîm olundukda yedimde olduğu hâlde harîk vâki‘ oldukda te‘addî ve taksîrimsiz muhterik olup ve altı yüz akçesini dahi merkūme Rahime’nin nafaka-i mefrûzası hüccet-i şer‘iyye ve vesâyet ve nezâreti hücec resmleri ile ashâbına teslîm ettiğim düyûna aldığım hüccet-i şer‘iyyelerin rüsûmuna sarf edip mecmû‘-ı [meblağeyn-i] mezkûreynden yedimde ancak bin beş yüz seksen dokuz akçesi vardır deyip [14a] minvâl-i meşrûh üzere Müslimîn huzûrunda muhâsebesi görüldükde ba‘de’l-hesâb bâkī sekiz bin akçe zuhûr edip istihlâki ile zimmetinde deyn olduğuna i‘tirâfını bi’l-külliyye inkâr edicek müdde‘iye-i merkūme Rahime’den da‘vâ-yı meşrûhasını mübeyyine beyyine taleb olundukda udûl-i Müslimînden mahmiye-i mezbûrede Dîvâne Ali mahallesi sükkânından Mustafa Çelebi ve Ali Çelebi ibney Ramazan nâm kimesneler li-ecli’ş-şehâde meclis-i şer‘-i hatîr-i lâzimü’t-tevkīrde hâzırân olup gıbbe’l-istişhâd herbiri merkūm Pîrî Çelebi’nin minvâl-i meşrûh üzere muhâsebesini gördükde ba‘de’l-hesâb merkūm Pîrî Çelebi bizim huzûrumuzda müdde‘iye-i merkūme Rahime’nin meblağ-ı mezkûr sekiz bin akçesini masârıfına sarf ve istihlâk, zimmetinde vâcibü’l-edâ deyni olduğuna tav‘an i‘tirâf etmişdir bu vechile meblağ-ı mezbûrun merkūm Pîrî Çelebi üzerine edâsı vâcibdir biz bu husûsa şâhidleriz şehâdet dahi ederiz deyu edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle oldukdan sonra meblağ-ı mezbûr sekiz bin akçeyi merkūme Rahime’ye edâ ile mezbûr Pîrî Çelebi üzerine ilzâm olunup mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: El-hâc Hüsrev b. Abdullah, Mustafa Çelebi b. Halil Ağa, Osman Beşe çukadâr, Salih Efendi el-kâtib, Mehmed Efendi b. Veli Efendi, İsa Bey b. Ahmed ve gayruhüm mine’l-[hâzırîn.]