Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 148 Hüküm no: 82 Orijinal metin no: [13b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. İbrahim’in muhalaa yoluyla kocası Mustafa b. Mehmed’den boşandığı (Muhâla‘a) Mahmiye-i İstanbul’da Sultân Selim Câmi‘i kurbünde Çukurbostan mahallesinde sâkine Sâliha bt. İbrahim nâm hâtun zevc-i dâhil-bihâsı işbu râfi‘ü’l-kitâb Mustafa b. Mehmed mahzarında ikrâr ve takrîr-i kelâm edip zevcim mezbûr Mustafa ile zimmetinde mütekarrir olan bin iki yüz akçe mehr-i müeccelim ve nafaka-i iddetim ve meûnet-i süknâm üzerine ve zevcim mezbûr Mustafa’nın firâşından hâsıl olan ve hamlimden tevellüd eden veledi ba‘de’t-tevellüd hakk-ı hıdâne sükūtuna değin kendi malımdan infâk ve iksâ üzerine zevcim mezbûr Mustafa ile muhâla‘a-i sahîha-i şer‘iyye ile muhâla‘a ettikden sonra ol dahi hul‘-ı mezkûru minvâl-i muharrer üzere kabûl edip zevciyyete müte‘allika da‘vâdan herbiri âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Tahrîren fi’l-yevmi’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: El-hâc Yusuf el-müezzin, Ahmed Beşe b. Ali, Musa b. Ahmed, Abdulaziz b. Şa‘ban ve gayruhüm mine’l-[hâzırîn]