Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 150 Hüküm no: 85 Orijinal metin no: [14a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hassa Terzibaşı Mehmed Ağa’nın merhum Kemhacıbaşı Mehmed Ağa’ya iki bin guruş borcu olduğunu vasisinin talebi üzerine ikrar ettiği Fazîletlü efendi hazretlerinin imzâsıyladır. Mahmiye-i İstanbul’da Koca Mustafa Paşa kurbünde Duhânîzâde mahallesinde sâkin iken bundan akdem vefât eden Kemhâcıbaşı Mehmed Ağa’nın vesâyâsını tenfîze vasiyy-i muhtârı olduğu bi-hasebi’ş-şer‘ mütehakkık olan işbu kitâbın sâhibi umdetü’l-emâcid ve’l-ekârim câmi‘u’l-mehâmid ve’l-mekârim Yusuf Ağazâde demekle şehîr Mustafa Ağa dîvân-ı ma‘delet-unvânda ma‘kūd olan mahfil-i kazâda hâssa terzibaşı olup Saray-ı cedîd-i sultânî’de vâki‘ taşra hazînede hazînedârbaşı olan kıdvetü’l-a‘yân Mehmed Ağa mahzarında bi’l-vesâye üzerine takrîr-i da‘vâ edip bin elli sekiz senesinde mezkûr Mehmed Ağa levn ve zirâ‘ı ve vasfı ilm-i şer‘î ile ma‘lûm akmişe-i mütenevvi‘ayı taraf-ı mîrî için üç bin beş yüz kıt‘a riyâlî guruşa mezkûr Kemhacıbaşı Mehmed Ağa’dan hayâtında iştirâ ve kabz ve mîrîye teslîm ve semen-i mezbûru sene-i merkūmede Vilâyet-i Rumeli’nde Premedi mukāta‘ası hazînesinden istîfâ etmek üzere mukāta‘a-i mezbûreyi mîrîden iltizâm ve semen-i mezbûru mukāta‘a-i mezbûre mâlından tamâmen ahz u istîfâ edip mezkûr Kemhacıbaşı Mehmed Ağa’ya vefâtına değin semen-i mezbûrdan bir akçe vermeyip kendi masârıfına sarf ve istihlâk etmişdir suâl olunup meblağ-ı mezbûru vesâyetim hasebiyle taleb ederin suâl olunsun dedikde gıbbe’s-suâl mezbûr Mehmed Ağa cevâbında fi’l-hakīka kaziyye bâlâda tafsîli mürûr ettiği vech üzere olup lâkin semen-i mezbûrun üç kîse olmak üzere bin beş yüz riyâlî guruşu müteveffâ-yı merkūm Kemhacıbaşı Mehmed Ağa’ya hayâtında def‘ ve teslîm edip ancak zimmetimde iki bin riyâlî guruş bâkī kalmışdır deyu bin beş yüz riyâlî guruşu def‘le mukābile ve iki bin guruş el-ân zimmetinde deyn olduğunu ikrâr edicek mezkûr Mehmed Ağa’dan def‘-i mezbûrunu mübeyyine beyyine taleb olundukda ityân-ı beyyine için istimhâl edip mehl-i şer‘î ile imhâl olundukdan sonra ikrârı olan meblağ-ı mezbûru edâya mezbûr Mehmed Ağa’ya tenbîh olunup mâ-vaka‘a bi’t-taleb ketb olundu. Fi’l-yevmi’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mehmed Çavuş b. Resul, İvaz Ağa b. Hüseyin ser-muhzırân, Hamza Ağa b. Abdullah, Mehmed Çelebi b. Mustafa.