Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 151 Hüküm no: 86 Orijinal metin no: [14a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Olanşah bt. Mustafa’nın muhallefatının bir kısmını gizlediği iddiasıyla kocası Hüseyin b. Vildan’ın merhumenin kızı Sâliha aleyhine açtığı davada iddiasını ispat edemediği Mahmiye-i İstanbul’da Yavuzer mahallesinde sâkine iken bundan akdem vefât eden Olanşah bt. Mustafa nâm hâtunun verâseti zevc-i [metrûkü] Hüseyin b. Vildan nâm kimesne ile sulbiye kebîre kızı Sâliha nâm hâtuna münhasıra olduğu şer‘an mütehakkık oldukdan sonra mezkûr Hüseyin meclis-i şer‘-i hatîr-i lâzimü’t-tevkīrde müteveffât-ı mezbûrenin terekesine vâzı‘atü’l-yed olan işbu bâ‘isetü’l-vesîka merkūme Sâliha Hâtun mahzarında üzerine da‘vâ ve takrîr-i kelâm edip müteveffât-ı mezbûrenin terekesinden bir sîm raht kuşak ve bir tek altın bilezik ve bir sepet sandığı ve dört sahan ve iki börek tepsisi ve iki kebîr güğüm ve bir kebîr tâbe ve iki tas ve bir hamam havlusu ve iki bakraç ve iki şem‘dân ve bir ibrik ve bir maşrabasını mezbûre Sâliha ahz u kabz ve ihfâ edip bana isâbet eden rub‘ hisse-i şer‘iyyemi teslîmden imtinâ‘ eder hâlâ mezbûre Sâliha’dan suâl olunup eşyâ-i mezbûreden bana isâbet eden hisse-i şer‘iyyemi teslîme mezbûre Sâliha’ya tenbîh olunmak matlûbumdur dedikde gıbbe’s-suâl akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ muhallefât-ı müteveffât-ı merkūmeden bir sîm raht kuşak ve bir tek altın bilezik ve bir sepet sandığı ve dört sahan ve iki börek tepsisi ve iki kebîr güğüm ve bir kebîr tâbe ve iki taş ve bir hamam havlusu ve iki şem‘dan ve bir ibrik ve bir maşrabaya vaz‘-ı yed etmeyip ol vechile eşyâ-i mezbûre müdde‘î-i mezbûra hisse-i şer‘iyyesini red ve teslîmi vâcib olmadığına mezbûre Sâliha’ya yemîn teklîf olundukda ol dahi hasbe’l-mes’ûl yemîn billâhi’l-aliyyi’l-azîm etmeğin mûcibiyle bilâ-beyyine mu‘ârazadan men‘ birle mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: El-hâc Ömer b. Himmet, Osman Çavuş b. Abdullah, İbrahim Ağa b. Süleyman, İbrahim Beşe b. Ali, Mustafa Beşe b. Mustafa, Ahmed Çelebi b. İbrahim, Osman Beşe çukadâr ve gayruhüm mine’l-[hâzırîn.]