Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 154 Hüküm no: 90 Orijinal metin no: [14b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasref v. Kirkor’un eşya bedelinden Mardros v. Kirakos’tan alacağı olduğu Acem tüccârından Culhalı tâifesinden olup mahmiye-i İstanbul’da Vâlide Sultân Hanı’nda sâkin olan hâmilü hâze’l-kitâb Hasref v. Kirkor nâm Ermeni meclis-i şer‘-i hatîr-i lâzimü’t-tevkīrde mahmiye-i mezbûrede Kâtib Kasım mahallesi sükkânından Mardros v. Kirakos nâm Ermeni mahzarında üzerine takrîr-i da‘vâ edip mezbûr Mardros zimmetinde yedimden iştirâ ve kabz ettiği ma‘lûmü’l-cins ve’n-nev‘ Acem metâ‘ı semeninden ba‘de külli’l-hesâb yüz yetmiş beş riyâlî guruş ile üç rub‘ riyâlî guruş hakkım vardır suâl olunup meblağ-ı mezbûrun merkūm Mardros’dan alıverilmesin taleb ederim dedikde gıbbe’s-suâl merkūm Mardros cevâbında fi’l-hakīka müdde‘î-i merkūm Hasref’e yedinden ve mülkünden iştirâ ve kabz ettiğim ma‘lûmü’l-cins ve’n-nev‘ Acem metâ‘ı semeninden yüz yetmiş beş riyâlî guruş ile üç rub‘ riyâlî guruş vâcibü’l-edâ ve lâzimü’l-kazâ deynim vardır deyu müdde‘î-i merkūm Hasref’e vech-i meşrûh üzere yüz yetmiş beş riyâlî guruş ile üç rub‘ riyâlî guruş deyni olduğuna tav‘an ikrâr ve i‘tirâf edice merkūm Madros’un i‘tirâfı mûcebince meblağ-ı mezbûru merkūm Hasref’e edâ ile merkūm Mardros muvâcehesinde üzerine ilzâm-ı sahîh-i şer‘î kılınıp mâ-hüve’l-vâki‘ bi’t-taleb ketb olunup men lehü’t-taleb yedine def‘ olundu. Fi’l-yevmi’l-hâdî ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Salih Efendi b. Salih el-kādî, Mehmed Emin b. Veli Efendi el-kādî, İsmail Çelebi b. Yunus, Mehmed Çelebi b. Haydar, Hacı Ca‘fer b. Abdullah, İsa Bey b. Ahmed.