Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 153 Hüküm no: 89 Orijinal metin no: [14b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe b. Mehmed’in Köseleci Ramazan b. Mehmed’e kösele bedelinden olan borcunu taksitle ödemeye söz verdiği Dergâh-ı âlî dâme mahfûfen bi’l-me‘âlî yeniçerilerinin on beşinci yayabaşılarından olup mahmiye-i Edirne ahâlîsinden Osman Beşe b. Mehmed nâm râcil meclis-i şer‘-i hatîr-i lâzimü’t-tevkīrde mahmiye-i İstanbul’da Karabaş mahallesi ahâlîsinden olup Sarachane’de köseleci tâifesinden Ramazan b. Mehmed mahzarında tav‘an ikrâr ve i‘tirâf edip mezbûr Ramazan’a yedinden müşterâ ve makbûz yirmi beş Karahisar köselesi semeninden dört bin beş yüz akçe ve beynimizde ma‘lûm Gerede köselesi semeninden dokuz yüz on akçe ki cem‘an beş bin dört yüz on akçe zimmetimde lâzimü’l-edâ ve vâcibü’l-kazâ deynim olup lâkin meblağ-ı mezbûru def‘aten edâya kudretim olmamağla ulûfemden zikrolunan odada odabaşı olanlardan her üç ayda dörder yüz akçe olmak üzere tarafımdan mezbûr Ramazan’ı vekîl ve menâbıma nâib nasb ü ta‘yîn eyledim dedikde ol dahi meblağ-ı mezbûru her üç ayda dörder yüz akçeden zikrolunan odada odabaşı olanlarından elli ayda ahz ve îfâ etmek üzere vekâlet-i mezkûreyi kabûl ve hizmet-i lâzımesin edâya müte‘ahhid olmağın mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sânî ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: İsa Bey b. Ahmed, Mustafa b. Mehmed, el-Hâc Receb b. Mehmed, Ömer Çelebi b. ( ) cerrâh, Ahmed Beşe b. Mehmed, Mehmed Beşe b. Mustafa ve gayruhüm mine’l-[hâzırîn.]