Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 155 Hüküm no: 92 Orijinal metin no: [15a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ostoyane bt. Mardros’un ölen babasının mirası hususunda kardeşi Makos ile kırk guruşa sulh olduğu Mahmiye-i İstanbul hısnı ebvâbından Topkapısı kurbünde Ahmed Paşa mahallesi sükkânından olup bundan akdem hâlik olan Mardros v. Vartan nâm zimmînin verâseti sulbî kebîr oğlu Makos ile sulbiye kebîre kızı Ostoyane[’ye] münhasıra olduğu şer‘an mütehakkık oldukdan sonra merkūme Ostoyane tarafından husûs-ı âti’l-beyânı ikrâra vekîl olup vekâleti mahalle-i mezbûre sükkânından Serkiz v. Niki ve Sihak v. Serkiz nâm Ermeniler şehâdetleri ile şer‘an sâbite olan zevci Kurd v. Kumru nâm Ermeni meclis-i şer‘-i hatîrde hâlik-i mezbûrun oğlu merkūm Makos muvâcehesinde bi’l-vekâle tav‘an ikrâr ve i‘tirâf edip müvekkilem merkūme Ostoyane’nin babası merkūm Mardros hâlik oldukda ism-i mâl ıtlâk olunur cümle terekesine oğlu merkūm Makos vaz‘-ı yed etmekle müvekkilem merkūme hisse-i şer‘iyyesini taleb etdikde merkūm Makos babası hâlik-i mezbûrun ism-i mâl ıtlâk olunur terekesi kaldığını bi’l-külliyye inkâr etmekle beynlerinde münâza‘ât-ı kesîre vukū‘undan sonra tavassut-ı muslihûn ile an-inkâr kırk riyâlî guruşa sulh olduklarında müvekkilem merkūme dahi sulh-ı mezbûru kabûl ve bedel-i sulh olan meblağ-ı mezbûr kırk riyâlî guruşu meclis-i sulhda merkūm Makos yedinden tamâmen ahz u kabz edip mûrisleri ve babaları tereke[si] da‘vâsından berî olup karındaşı merkūm Makos’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi min ba‘d müvekkilem merkūme Ostoyane’nin karındaşı merkūm Makos üzerinde babası hâlik-i mezbûrun terekesine müte‘allik bi-vechin mine’l-vücûh ve sebebin mine’l-esbâb da‘vâ ve hakkı kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Serkiz v. Murad, Serkiz v. Batman, Mıgırdiç v. Kerh, Vartan v. Toros.