Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 156 Hüküm no: 93 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Kenan’ın nazırı Şaban Bey’in talebi üzerine görülen muhasebesinde vasisi Yusuf Bey’in zimmetinde Mustafa’ya ait 23.700 akçe olduğunun anlaşıldığı Mahmiye-i İstanbul’da Çukur mahallesi sükkânından iken bundan akdem vefât eden Kenan Bey b. Abdullah nâm kimesnenin sulbî oğlu Mustafa nâm sagīrin hasbî nâzırı olan işbu bâ‘isü’r-rakīm Şa‘ban Bey b. Hasan meclis-i şer‘-i hatîr-i lâzimü’t-tevkīrde sagīr-i mezbûrun tesviye-i umûruna kıbel-i şer‘den mansûb vasîsi olan Yusuf Bey b. Abdullah mahzarında takrîr-i kelâm ve ta‘bîr-i meram edip mezbûr Yusuf Bey sagīr-i mezbûrun vasîsi olmağla sagīr-i mezbûr vâlidesi olup bundan akdem vefât eden Âişe nâm hâtunun muhallefâtından müntakil iki bin beş yüz akçe ve yine sagīr-i mezbûrun zikri âtî timarlarını mukaddemâ vekâleten zabt eden Hızır Bey nâm kimesne zimmetinde olan iki bin ve yine sagīr-i mezbûrun Vilâyet-i Anadolu’da Kocaeli sancağında Sapanca kazâsında vâki‘ Tersiye nâm karye ve gayrıdan beş bin akçe yazar timarını ve yine sagīr-i mezbûrun Sermerem timarında olan hissesini altı seneden beri târih-i kitâba gelince vesâyeti hasebiyle zabt u tasarruf etmekle hâlâ vasiyy-i mezbûrun sinîn-i mezbûrede olan îrâd ve masârıfinın muhâsebesi görülmesini taleb ederim dedikde vasiyy-i mezbûr Yusuf Bey’in muhâsebesi görülüp zikrolunan Tersiye timarından beher sene onar bin akçe ve sagīr-i mezbûr vâlidesi müteveffât-ı merkūme muhallefâtından iki bin beş yüz akçe ve mezbûr Hızır Bey’den dahi iki bin akçe ve zikrolunan Sermerem timarından dahi üç bin akçe ki cem‘an vasiyy-i mezbûrun i‘tirâfı üzere altı senede altmış yedi bin beş yüz akçe makbûzu olup meblağ-ı mezbûrun otuz üç bin akçesini timar-ı mezbûrun altı senede mîrî bedeliyyesine ve on bin sekiz yüz akçesini dahi sagīr-i mezbûr için kıbel-i şer‘den takdîr olunan yevmî beşer akçe nafakasına sinîn-i mezbûrede sarf edip ki cem‘an kırk üç bin sekiz yüz akçesini harc u sarf edip bâkī vasiyy-i mezbûr zimmetinde yirmi üç bin yedi yüz akçe zuhûr edip meblağ-ı mezbûr yedinde olmağla onu on bir buçuk hesâbı üzere i‘mâl eylediğini vasiyy-i mezbûr Yusuf Bey ikrâr ve i‘tirâf etmeğin mâ-vaka‘a nâzır-ı merkūm talebiyle ketb ve sebt olundu. Fi’l-yevmi’s-sâbi‘ aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Hacı Yunus b. ( ), Mehmed Beşe b. ( ), İbrahim Beşe b. ( ), Üstâd Siyami b. ( ), İsmail Çelebi b. ( ), İsa Bey b. ( ), Mehmed Çelebi b. ( ), Osman Beşe b. ( ) ve gayruhüm.