Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 167 Hüküm no: 108 Orijinal metin no: [17a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Defterzâde Mustafa Ağa b. Ömer Efendi’nin haksız yere atını alan hizmetçisi İbrahim b. Durmuş’un atı sahibine iadesi [Mahmiye-i İstanbul’da] Davudpaşa mahallesinde sâkin Defterzâde demekle şehîr işbu sâhibü’l-kitâb Mustafa Ağa b. Ömer Efendi meclis-i şer‘-i [şerîfe hâzır] olup mahmiye-i mezbûrede Ekşikaratut mahallesinde sâkin İbrahim b. Durmuş mahzarında üzerine takrîr-i da‘vâ [edip mezbûr İbrahim] benim yanımda hizmetkârım olmağla hâlâ mülkümde olan yirmi beş riyâlî guruş kıymetli bir doru atımı bi-gayrı hakkın ahz ve vaz‘-ı yed etmişdir suâl olunup alıverilmesin taleb ederim dedikde gıbbe’s-suâl mezbûr İbrahim cevâbında ben mezkûr Mustafa Ağa’nın hizmetinde olmağla zikrolunan atı bana mukaddemâ hibe ve temlîk eyledi ona binâen vaz‘-ı yed ederim deyu def‘le mukābile edicek gıbbe’l-istintâk ve’l-inkâr mezkûr İbrahim’den def‘-i meşrûhunu mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-vâki‘ mezkûr Mustafa Ağa’ya zikrolunan atı hizmetkârı mezkûr İbrahim’e bundan akdem hibe ve temlîk eylemediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-azîm ettikden sonra mezkûr İbrahim’den zikrolunan atı def‘ ve teslîmine tenbîh olunup mâ-hüve’l-vâki‘ bi’t-taleb ketb olundu. Fi’l-yevmi’s-sâlis aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ahmed Çavuş b. Ali, İbrahim Çavuş b. Abdullah, Ahmed Efendi b. Mehmed, Mustafa Efendi el-keşşâf ve gayruhüm mine’l-hâzırîn.