Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 168 Hüküm no: 109 Orijinal metin no: [17a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Reis b. Mustafa’nın Keşab kazasındaki iki adet bahçesini Ali Beşe b. Veli satıp bazı tarlalarının da kullanım hakkını devrettiği Vilâyet-i Anadolu’da Trabzon sancağında Keşab kazâsında Haramiköyü nâm karye sâkinlerinden Ali Reis b. Mustafa Aykud? meclis-i şer‘-i hatîr-i lâzimü’t-tevkīrde işbu sâhibü’l-kitâb Ali Beşe b. Veli nâm [kimesne] mahzarında ikrâr ve takrîr-i kelâm edip zikri âtî akdin sudûruna değin silk-i mülkümde münselik yedimde mülk ve hakkım olup karye-i mezbûrede vâki‘ bir tarafı Himmet ve Mustafa ibneyn Mehmed mülkleri ve bir tarafı Osman Kethüdâ b. Halil mülkü ve bir tarafı Tayyib b. Mustafa mülkü [ve] tarîk-ı âm ile mahdûd mülk evim bahçesiyle fındık bahçe iki kıt‘a bahçelerimi kâffe-i hukūk ve merâfıkı ve âmme-i tevâbi‘ ve levâhıkı ile sekiz bin iki yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Ali Beşe’ye bey‘ edip ol dahi iştirâ ve kabûl eyledikden sonra yine zikri âtî tefvîzin sudûruna değin yedimde ve taht-ı tasarrufumda olup karye-i mezkûrede vâki‘ bir tarafı Mustafa b. Şa‘ban tarlası ve bir tarafı Muslihidin b. İbrahim tarlası ve bir tarafı Bıyıklı Mustafa b. ( ) tarlası ve bir tarafı tarîk-ı âm ile mahdûd ve mümtâz üç kıt‘a tarlalar ve yine karye-i mezbûrede vâki‘ Kedkütab tarlası demekle tarladan gayrı dört kıt‘a babamdan müntakil tarlalarımın hakk-ı tasarrufunu izn-i sâhib-i arz ile iki bin nakd-i râyic fi’l-vakt akçe bedel mukābilesinde mezbûr Ali Beşe’ye ferâğ ve tefvîz edip ol dahi tefevvüz ve kabûl ettikden sonra semen-i mezbûr ile bedel-i merkūm cem‘an on bin iki yüz akçeyi mezbûr Ali Beşe yedinden bi’t-tamâm ve’l-kemâl ahz u kabz edip zikrolunan bahçeleri ve tarlaları mahallinde zabt ve tasarrufa merkūm Ali Beşe’yi taslît eyledim dedikde mukırr-ı merkūm Ali Reis’in vech-i muharrer üzere cârî olan ikrârın el-mukarru lehü’l-merkūm Ali Beşe vicâhen ve şifâhen tasdîk ve tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’l-hâdî aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Hasan Reis b. Mehmed, Balıkçı Hasan Reis b. Sevindik, Mehmed b. Ömer, Ömer b. Alâeddin, Ahmed b. Hasan, Abdülkerim b. ( ) ve gayruhüm.