Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 168 Hüküm no: 110 Orijinal metin no: [17a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Yusuf’un Küre-i cedid’deki kazancı dükkanı ve içindeki aletleri Maden b. Mehmed’e sattığı Fi’l-asl Vilâyet-i Anadolu’da Kastamonu sancağında Küre-i cedîd kasabasında sâkin iken bundan akdem vefât eden Yusuf nâm kimesnenin sulbî sagīr oğlu ve bi’l-inhisâr vârisi olan Mustafa nâm sagīrin tesviye-i umûruna kıbel-i şerî‘at-i mergūbeden mansûbe vasîsi olan işbu bâ‘isetü’l-vesîka Âmine bt. İbrahim nâm hâtun meclis-i şer‘-i hatîr-i lâzimü’t-tevkīrde Maden b. Mehmed nâm kimesne mahzarında üzerine da‘vâ ve takrîr-i kelâm edip sagīr-i mezbûra babası müteveffâ-yı mezbûrdan müntakil olup kasaba-i mezbûrede vâki‘ lede’l-ahâlî ve’l-cîrân ma‘lûmü’l-hudûd bir bâb mülk kazgancı dükkânı ve içinde mevcûd olan âlâtından yüz yirmi vakıyye örs ve doksan dört vakıyye sâir âlâtı sagīr-i mezbûrun zarûret-i nafakası için ma‘rifet-i hâkimü’ş-şer‘le ba‘de’l-müzâyede altı bin altı yüz altmış akçede mezbûr Maden üzerinde karâr edip ziyâde ile tâlib-i âhar zuhûr etmemekle ben dahi dükkân-ı mezbûru ve âlâtını safka-i vâhide ile vesayetim hasebiyle mezbûr Maden’e meblağ-ı mezbûr altı bin altı yüz altmış akçeye bâtten bey‘ ve teslîm ol dahi iştirâ ve tesellüm ve semeninden altı yüz kırk akçesini bana teslîm edip meblağ-ı bâkī altı bin yirmi akçeye dahi (…) suâl olunsun dedikde gıbbe’s-suâl mezbûr Maden cevâbında ben dükkân-ı mezbûru (…) [17b] kırk akçesini edâ ve teslîm edip semen-i mezbûrdan zimmetimde ancak dört bin üç yüz altmış akçe bâkī kaldı ve ziyâde altı yüz altmış akçeye iştirâsını inkâr edicek gıbbe’l-istintâk ve’l-inkâr evvelâ müdde‘iye-i mezbûreden ziyâde altı yüz altmış akçeye iştirâsını mübeyyine beyyine taleb olundukda ityân-ı beyyine için istimhâl etmeğin mehl-i şer‘î olundukdan sonra sâniyen mezbûr Maden’den müdde‘iye-i merkūmenin kabzına i‘tirâfı olan altı yüz kırk akçenin def‘ini mübeyyine beyyine taleb olundukda ol dahi ityân-ı beyyine için istimhâl etmeğin mehl-i şer‘î ile ba‘de’l-imhâl mûcibiyle (…) olan dört bin üç yüz altmış akçeyi mezbûre Âmine’ye edâya merkūm Maden’e tenbîh olunup mâ-vaka‘a bi’t-taleb ketb olundu. [Fi’l-yevmi’l]-hâdî aşer min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Hamza Bey b. Yahya, Osman Beşe çukadâr, Mustafa Efendi b. Muharrem ve gayruhüm.