Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 172 Hüküm no: 117 Orijinal metin no: [18a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ofdar v. Garyo’nun Çemişgezek’e bağlı Siptoros nahiyesinin Hidi köyündeki bazı arazisini on guruşa Saka Arslan v. Gazal’a sattığı Vilâyet-i Anadolu’da Çemişgezek kazâsına tâbi‘ Siptoros nâhiyesinde Hidi nâm karye sâkinlerinden Ofdar v. Garyo nâm zimmî mahfil-i kazâda işbu bâ‘isü’l-vesîka Sakkā Arslan v. Gazal nâm zimmî muvâcehesinde tav‘an ikrâr ve i‘tirâf edip zikri âtî akdin sudûruna değin silk-i mülk-i sahîhimde münselik mülk ve hakkım olup karye-i mezbûrede vâki‘ bir tarafı Poğnik v. Arosis mülküne ve bir tarafı Uzun Ali b. Abdullah mülküne ve bir tarafı kefere mekābiri ve bir tarafı müşterî-i mezkûr mülküne müntehî arsa-i hâliyemi ve yine müşterî-i mezbûrun menzili cânibinde vâki‘ bir tarafı kefere mekābiri ve bir tarafı Ahmed Çelebi b. Ali Beşe mülküne ve bir tarafı yine müşterî-i mezkûr mülküne ve bir tarafı tarîk-ı âm ile mahdûd olan cemî‘ mülk arsa-i hâliyemi kâffe-i hukūk ve merâfıkı ile dahi mezbûr Uzun Ali’nin bostanı kenârında mezkûr Ahmed Çelebi’nin bağı içinde Gülübolu demekle ma‘rûf olup kadimden zikrolunan arsalara mürûr ve ubûr edip hakk-ı mürûrum olan tarîkı dahi bi-cümleti’t-tevâbi‘ ve’l-levâhık mezkûr Sakkā Arslan’a on kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh ile bey‘ edip ol dahi vech-i muharrer üzere iştirâ ve kabûl eyledikden sonra semeni olan meblağ-ı mezkûr on kıt‘a riyâlî guruşu müşterî-i mezkûr Sakkā Arslan yedinden tamâmen ahz u kabz edip zikrolunan arsa-i mahdûde-i mezkûreleri mahallinde zabt ve tesellüme tarafımdan mezkûr Sakkā Arslan’ı taslît eyledim min ba‘d zikrolunan arsa-i hâliye mezkûr Sakkā Arslan’ın mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Sefer Bey b. Abdullah, Mustafa Bey b. Abdullah, Yusuf odabaşı, Ali Çelebi b. Mehmed, Murad Bey b. Abdullah, Süleyman Beşe b. Bâli Beşe, Derviş b. Mehmed ve gayruhüm.