Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 173 Hüküm no: 118 Orijinal metin no: [18a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Salamon v. Natuf’un alacağı olduğu iddiasıyla Uncu Vasil v. Adam aleyhine açtığı davada iddiasını ispat için kendisine süre verildiği Mahmiye-i İstanbul’da Eğriboz cemâ‘atinden Salamon v. Natuf nâm Yahudi meclis-i şer‘-i hatîrde uncu tâifesinden olup Fenerkapısı hâricinde Abdi Subaşı mahallesinde sâkin Vasil v. Adam nâm Yahudi muvâcehesinde üzerine da‘vâ edip merhûm Kara Çelebizâde Mahmud Efendi Vakfı’ndan icâre-i mu‘accele-i ma‘lûme ve ayda yüz beşer akçe ücret-i müeccele ile taht-ı tasarrufumda olup mahalle-i mezbûrede vâki‘ beynimizde ma‘lûmü’l-hudûd olan menzili beher mâh yüz beşer akçe cânib-i vakfa ve yüz yirmi akçe bana vermek üzere ayda ikişer yüz yirmi beşer akçeye merkūm Vasil’e bundan akdem îcâr ve teslîm edip ol dahi vech-i muharrer üzere istîcâr ve kabûl eyledikden sonra icâre-i mezkûreden zimmetinde beş ayda bana ve cânib-i vakf-ı mezbûra bin yüz yirmi akçe müctemi‘ olup zimmetinde bâkīdir hâlâ mezbûrdan suâl olunup alıverilmesi matlûbumdur dedikde gıbbe’s-suâl mezbûr Vasil cevâbında fi’l-hakīka menzil-i mezbûru merkūm Salamon’dan ayda ikişer yüz yirmi beşer akçeye istîcâr ve kabûl eylediğimden sonra beher mâh cânib-i vakfa ve müdde‘î-i mezbûra icâre-i merkūmeyi edâ ve teslîm edip müdde‘î-i mezbûrun da‘vâ eylediği beş aylık icâreden müctemi‘ olan meblağ-ı mezbûrun cânib-i vakf-ı merkūma âid olan beş yüz yirmi beş akçesini câbî-i vakf-ı mezbûra ve bâkī altı yüz akçesini müdde‘î-i mezbûra edâ ve teslîm eyledim dedikde gıbbe’l-istintâk ve’l-inkâr mezbûr Vasil’den sıdk-ı makāline beyyine taleb olundukda ikāmet-i beyyine için istimhâl etmeğin mehl-i şer‘î ile imhâl olunup mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Salih Efendi, Mustafa Çelebi, Ali Efendi, Salih Çelebi el-mukayyid ve gayruhüm mine’l-[hâzırîn.]