Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 182 Hüküm no: 128 Orijinal metin no: [19b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Peşpeşe vefat eden Mustafa Beşe b. Ahmed ve kızı Havva’nın terekeleri hususunda varislerinden Mehmed Beşe ile Ayşe bt. Aslan’ın sulh oldukları Fi’l-asl Vilâyet-i Anadolu’da Karadeniz Ereğlisi demekle ma‘rûf kasabada Aşağı mahalle sâkinlerinden olup mahmiye-i İstanbul’da Tahtaminare mahallesinde sâkin iken vefât eden Mustafa Beşe b. Ahmed nâm odabaşının verâseti zevce-i metrûkesi Âişe bt. Aslan nâm hâtuna ve sulbiye sagīre kızı Havvâ’ya ve li-ebeveyn karındaşı Mehmed Beşe’ye münhasıra oldukdan sonra kable’l-kısme merkūme Havvâ dahi vefât edip verâseti anası mezbûre Âişe’ye münhasıra olduğu şer‘an mütehakkık oldukdan sonra merkūm Mehmed Beşe meclis-i şer‘-i hatîr-i lâzimü’t-tevkīrde müteveffâ-yı mezbûrun terekesine vâzı‘atü’l-yed olan zevcesi mezbûre Âişe tarafından husûs-ı âti’l-beyânı tasdîka vekîl ve zikri âtî ibrâyı ikrâra vekîl olup vekâleti Mehmed Halîfe b. Abdullah el-müezzin ve Mustafa Çavuş b. Hasan Çavuş şehâdetleri ile şer‘an sâbite olan Mehmed Çavuş b. Ahmed mahzarında tâyi‘an ikrâr ve i‘tirâf edip karındaşım müteveffâ-yı mezbûr ile kızı müteveffât-ı merkūme müteâkiben vefât etmeleriyle mecmû‘-ı terekelerine zevcesi müvekkile-i merkūme Âişe Hâtun vaz‘-ı yed etmekle bana âid olan hisse-i şer‘iyyemi müvekkile-i merkūme Âişe Hâtun’dan taleb ve da‘vâ ettiğimde merkūme Âişe cevâbında merkūmânın terekelerinden hisse-i şâyi‘anı alâ tarîkı’t-tehârüc iki bin râyic [fi’l]-vakt akçe üzerine mukaddemâ benimle sulh olup lâkin bedel-i sulh olan meblağ-ı mezbûru kabz etmedin deyu cevâb ve bedel-i mezkûru bana teslîm murâd etdikde ben dahi sulh-ı mezbûru kabûl ettiğimi inkâr ile beynimizde münâza‘ât-ı kesîre vâkı‘a olmuşidi el-hâletü hâzihî muslihûn tavassut [edip] merkūme Âişe ile beni müteveffiyân-ı mezbûrânın terekelerinden hisse-i şer‘iyyem da‘vâsından iki bin sekiz yüz akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru merkūme yedinden tamâmen ahz u kabz edip da‘vâ-yı mezkûremden merkūme Âişe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d merkūme ile bi-vechin mine’l-vücûh ve bi-sebebin mine’l-esbâb da‘vâ ve nizâ‘ım kalmadı dedikde gıbbe’t-tasdîkı’l-mu‘teber vekîl-i merkūm Mehmed Çavuş dahi mezbûr Mehmed Beşe mahzarında bi’l-vekâle ikrâr ve i‘tirâf edip müvekkile-i merkūme Âişe dahi müteveffâ-yı mezbûr Mustafa Beşe’nin babası müteveffâ-yı [mezbûr] Ahmed’in muhallefâtından mezbûr Mehmed Beşe’nin ahz u kabz eylediği elli bin akçenin zevci müteveffâ-yı mezbûr Mustafa Beşe’ye isâbet eden nısf hisse-i şer‘iyyesinden kendiye isâbet eden hisse-i şer‘iyyesini da‘vâsından merkūm Mehmed Beşe’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi min ba‘d merkūm Mehmed Beşe ile husûs-ı mezbûra müte‘allika bi-vechin mine’l-vücûh da‘vâ ve nizâ‘ım kalmadı dedikde mukırr-ı merkūm Mehmed Çavuş’un bi’l-vekâle vech-i muharrer üzere cârî olan ikrârını merkūm Mehmed Beşe bi’l-müvâcehe tasdîk ve tahkīk etmeğin mâ-vaka‘a bi’t-taleb ketb olundu. Tahrîren fi’l-yevmi’r-râbi‘ ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ahmed Ağa b. Abdullah, Hasan Çavuş b. Hızır, Mehmed Odabaşı b. Süleyman, İbrahim b. Ahmed, Yusuf Beşe b. Abdullah, Abdülkadir Efendi b. Yusuf ve gayruhüm.