Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 180 Hüküm no: 127 Orijinal metin no: [19b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vulçıtrın Sancak Beyi Ebubekir Bey b. İbrahim’in Korucu Mehmed Çelebi ve Sarac Mustafa Çelebi’ye olan borçlarını ödediği Husûs-ı âti’z-zikrin mahallinde tahrîri iltimâs olunmağın savb-ı şer‘den Mevlânâ Mehmed Efendi b. Veli Efendi irsâl olunup ol dahi mahmiye-i İstanbul’da vâki‘ Dergâh-ı âlî yeniçerilerine mahsûs olan yeni odalardan on sekizinci sekbânlar kâtibi odasına varıp zeyl-i kitâbda mastûru’l-esâmi olan Müslimîn huzûrunda akd-i meclis-i şer‘-i şerîf etdikde mahmiye-i mezbûrede Davudpaşa mahallesinde sâkin olup bundan akdem Vilâyet-i Rumeli’nde vâki‘ Vulçıtrın Sancağı beyi olan umdetü’l-ümerâ’i’l-kirâm Ebûbekir Bey b. İbrahim tarafından husûs-ı âti’z-zikre vekâlet-i sahîha-i devriyye ile vekîl olduğu hüccet-i şer‘iyye ile şer‘an sâbit olup mahmiye-i mezbûrede Emirahor mahallesinde sâkin olan el-Hâc Derviş Beşe b. Abdülmennân meclis-i ma‘kūd-ı mezbûrda sâhibey hâze’l-kitâb Bâli Çavuşoğlu demekle ma‘rûf Korucu Mehmed Çelebi ile zikrolunan odanın hâlâ bayrakdârı olan Sarac Mustafa Çelebi mahzarlarında bi’l-vekâle tav‘an ikrâr ve i‘tirâf edip müvekkilim mezbûr Ebûbekir Bey mezbûr Korucu Mehmed Çelebi yedinden ve mâlından üç bin iki yüz kıt‘a riyâlî guruş ikrâz ve kabz ve masârıfına sarf ve istihlâk[l]e deyni olup ve mezbûr Sarac Mustafa Çelebi yedinden ve mâlından kezâlik beş yüz on kıt‘a riyâlî guruş iktirâz ve kabz ve masârıfına [sarf] ve istihlâkle deyni oldukdan sonra silk-i mülkünde münselik olan otuz altı bâfteli bir bâftesi yakutlu ve bâftesi incili olup ortasında olan bâftenin üzerinde bir zümrüd taşı olan mücevher kuşağını ve yedişer elmaslı bir çift altın bileziğini ve inci ile musanna‘ bir kebîr mukavva devâtını merkūm Korucu Mehmed Çelebi’ye meblağ-ı mezkûr mukābilesinde rehin vaz‘ ve teslîm edip ol dahi ba‘de’l-irtihân ve’l-kabz merkūm Ebûbekir Bey eşyâ-i mevsûfe-i mezkûreyi bey‘a ve semenlerinden düyûn-ı mezkûresini edâya mezbûrânın talebi ile azl ve in‘izâlden masûn vekâlet-i devriyye-i sahîha-i şer‘iyye ile beni vekîl nasb ü ta‘yîn etmişidi el-hâletü hâzihî vekâlet-i meşrûhayı kabûlüm ve hizmet-i lâzımesin edâya ta‘ahhüdüm sebebiyle zikrolunan rihânı bi-a‘yânihâ merkūm Korucu Mehmed Çelebi yedinden bi’l-külliyye ahz u kabz, sûk-ı sultânîde kirâren ve mirâren müzâyede ettirip tâlibîne arz ettiğimden sonra semen-i misillerinden ziyâde ile bey‘ ve semenlerini tamâmen ahz u kabz ettiğimden sonra merkūm Korucu Mehmed Çelebi’ye olan üç bin iki yüz kıt‘a riyâlî guruş deynini ve merkūm Sarac Mustafa Çelebi’ye olan beş yüz on kıt‘a riyâlî guruş deynini merkūmândan herbirine bi’t-tamâm ve’l-kemâl edâ ve teslîm ile müvekkilim merkūmun zimmetini düyûn-ı mezkûrdan berî olup ve rihân-ı mevsûfe-i mezkûreden merkūm Korucu Mehmed Çelebi yedinde bir şey kalmadı dedikde mezbûrân Korucu Mehmed Çelebi ve Sarac Mustafa Çelebi mezbûr el-Hâc Derviş b. Abdülmennân’ı kelimât-ı meşrûhasında herbiri bi’l-müvâcehe ve bi’l-müşâfehe tahkīk ve tasdîk ettiklerinden sonra herbiri müvekkil-i mezbûr Ebûbekir Bey zimmetinde mütekarrir olan haklarını vekîl-i mezbûr el-Hâc Derviş yedinden bi’t-tamâm ve’l-kemâl ahz u kabz ve istîfâlarına tav‘an ikrâr ve i‘tirâf eylediklerinde gıbbe’t-tasdîkı’ş-şer‘î vâki‘-i hâli mevlânâ-yı mezkûr mahallinde tahrîr ve ba‘dehû meclis-i şer‘-i hatîre gelip vukū‘u üzere ihbâr ve takrîr edicek mâ-hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Kebeci el-Hâc Mustafa b. Musa, Tabancacı Mehmed Çelebi [b.] İbrahim er-râcil, Hasan Beşe b. Abullah [an]-oda-i 23. Sekbân, Kazzâz Ali Beşe b. Mehmed er-râcil, Mehmed Beşe b. Hüseyin hammâmî, Veli Beşe b. Abdullah ser-oda-i 12. sekbân, Mustafa Çelebi b. Bâli Çavuş.