Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 183 Hüküm no: 130 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bayram Bey b. Şaban’ın Yazıcı mahallesindeki menzilinin varisleri tarafından İsmail Beşe ile İbrahim Çelebi’ye satıldığı Fi’l-asl Vilâyet-i Anadolu’da Bolu sancağında Yenice-i Eflağani kazâsına tâbi‘ Firuz nâm karyeden olup mahmiye-i İstanbul’da Yazıcı mahallesinde sâkin iken bundan akdem vefât eden Bayram Bey b. Şa‘ban nâm kimesnenin verâseti zevce-i metrûkesi Şerife İsmihan bt. Hasan nâm hâtun ile li-ebeveyn er karındaşı Mehmed’e ve li-ebeveyn kız karındaşı Âişe’ye münhasıra olduğu şer‘an zâhir ve müte‘ayyin oldukdan sonra mezbûre Şerife İsmihan Hâtun ile merkūm Mehmed asâleten ve mezbûr Âişe’nin dahi sadrî kebîr oğlu ve tarafından husûs-ı âti’l-beyâna vekîl olup mezbûrenin zâtını ma‘rifet-i şer‘iyye ile ârifân Mehmed b. Siyami ve Mustafa b. Mehmed nâm kimesneler şehâdetleri ile şer‘an vekâleti sâbite olan Mehmed b. Sefer vekâleten meclis-i şer‘-i hatîr-i lâzimü’t-tevkīrde kendi tarafından asîl ve li-ebeveyn kız karındaşı oğlu İbrahim Çelebi b. Yusuf tarafından husûs-ı âti’z-zikri tasdîka vekîl olup nehc-i şer‘î ve tarîk-ı mu‘teber-i mer‘î üzere şer‘an vekâleti sâbite olan işbu bâ‘isü’l-vesîka İsmail Beşe b. Ali mahzarında herbiri asâleten ve vekâleten ikrâr-ı tâm ve takrîr-i kelâm edip mûrisimiz müteveffâ-yı mezbûrun ile’l-vefât mülkü ve hakkı olup mahalle-i mezbûrede vâki‘ bir tarafı Aynî Hâtun bt. Mustafa mülküne ve bir tarafı Âişe Hâtun mülküne ve iki tarafı tarîk-ı âmma müntehî üç bâb fevkānî odaları ve bir bâb tahtânî odayı ve bir su kuyusunu ve tahta-pûşu ve bir ahırı ve kenîfi ve zât-ı eşcâr-ı müsmire ve gayr-ı müsmire bahçeyi müştemil mülk menzil ba‘de vefâtihî irsen bize isâbet ve intikāl etmişidi el-hâletü hâzihî menzil-i mahdûd-ı mezbûrda olan hisse-i irsiyye-i şer‘iyyelerimizi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile herbirimiz asâleten ve vekâleten müvekkil-i mezbûr İbrahim Çelebi ile mezbûr İsmail Beşe’ye on bin nakd râyic fi’l-vakt akçeye bey‘ ve teslîm onlar dahi bi’l-iştirâki’s-seviy iştirâ ve kabûl ve tesellüm eylediklerinden sonra semeni olan meblağ-ı mezbûr on bin mârrü’l-vasf akçeyi müvekkil-i mezbûr İbrahim Çelebi ile merkūm İsmail Beşe yedlerinden tamâmen ahz u kabz eyledik ba‘de’l-yevm menzil-i mahdûd-ı mezbûr merkūmân İbrahim Çelebi ve İsmail Beşe’nin mülk-i müşterâlarıdır diledikleri gibi mutasarrıf olsunlar dediklerinde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Umdetü’l-emâcid ve’l-a‘yân Sefer Ağa b. Abdülmennân, Ca‘fer Çelebi b. Said, Hasan Bey b. Abdullah, Osman Beşe b. Ahmed, es-Seyyid Osman b. es-Seyyid Hasan, Osman Beşe çukadâr, Süleyman Beşe b. Mustafa, Receb Bey b. Süleyman ve gayruhüm mine’l-[hâzırîn.]