Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 191 Hüküm no: 139 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Receb b. Osman’ın mülk menzil hissesini kardeşi Mehmed’e on bin akçeye sattığı Mahmiye-i İstanbul hısnı ebvâbından Cebealikapısı dâhilinde Seferikoz mahallesinde sâkin iken bundan akdem vefât eden Osman b. Abdullah’ın verâseti zevce-i metrûkesi Râbia bt. Seydi nâm hâtuna ve sulbî kebîr oğlu Receb’e ve sulbî sagīr oğlu Mehmed’e ve sulbiye kebîre kızı İsmihan’a münhasıra olduğu mütehakkık ve zevcesi mezkûre Râbia Hâtun zevci müteveffâ-yı mezbûrun terekesinden bi-hasebi’l-irsi’ş-şer‘î sümün hisse-i şer‘iyyesini alâ tarîkı’t-tehârüci’ş-şer‘î ahz u kabz eylediği zâhir ve mütebeyyin oldukdan sonra tereke-i müteveffâ-yı mezbûr beş sehm i‘tibâr olunup sihâm-ı mezkûreden ikişer sehmi oğulları mezkûrân Receb ve Mehmed’e ve bir sehmi kızı mezbûre İsmihan’a isâbet eylediği müte‘ayyin oldukdan sonra mezbûr Receb meclis-i şer‘-i hatîr-i lâzimü’t-tevkīrde karındaşı sagīr-i mezbûr Mehmed’in tesviye-i umûru için kıbel-i şer‘den mansûb vasîsi olan Seydi b. Mehmed mahzarında tav‘an ikrâr ve i‘tirâf edip babam müteveffâ-yı mezbûrun terekesinden olup mahalle-i mezkûrede vâki‘ bir tarafdan Kuşcu Mehmed mülküne ve bir tarafdan Araboğlu Mustafa mülküne ve bir tarafdan Muzaffer b. Abdullah mülküne ve bir tarafdan tarîk-ı âmma müntehî olup iki bâb fevkānî odayı ve tahta-pûşu ve bir su kuyusunu ve kenîfi müştemil olan menzilden benim mülk ve hakkım olup kıymet-i şer‘iyyesi on iki bin akçeye müsâvî olan iki sehm-i şâyi‘imi kâffe-i hukūk ve merâfıkıyla vasiyy-i mezbûr Seydi’ye on bin fıddî râyic fi’l-vakt akçeye bey‘-i bâtt-ı sahîh-i şer‘î ile bey‘ ve teslîm edip ol dahi kıymetinden ekal bey‘ olunmağla sagīr-i mezbûr için iştirâ olunmak her vechile evlâ ve enfa‘ olmağın minvâl-i meşrûh üzere sagīr-i mezbûr mâlıyla iştirâ ve tesellüm eyledikden sonra semen-i mezkûr on bin akçeyi vasiyy-i mezbûr Seydi yedinden bi’t-tamâm ahz u kabz eyledim ba‘de’l-yevm menzil-i mahdûd-ı mezkûrda benim mülk-i mevrûsum olan iki sehm-i şâyi‘imi karındaşım sagīr-i mezbûr Mehmed’in mülk-i müşterâsı ve hakk-ı sırfıdır dedikde gıbbe’t-tasdîk mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâmin ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Mehmed Efendi b. Mustafa el-imâm, Ahmed Çelebi el-müezzin, Mehmed b. Abdullah, Mehmed b. Abdullah, Mehmed Çelebi kuşçu, Yusuf b. Mehmed, Kadri Beşe b. Ahmed, Ebûbekir Çelebi b. el-Hâc Mehmed, Ali Halîfe b. el-Hâc Mehmed, Ali Halîfe b. Mehmed, Kadri Beşe b. Abdülvehhâb, el-Hâc Ömer b. Süleyman ve gayruhüm mine’l-[hâzırîn.]