Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 191 Hüküm no: 138 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Ağa b. Ahmed’in emanet olarak verdiğini iddia ettiği para ve eşyalarını kendisine iade etmesi için kardeşi Mahmud Ağa aleyhine açtığı davada iddiasını ispat edemediği Fazîletlü efendi hazretleri unvânları iledir. Mahmiye-i İstanbul’da Ahırkapı kurbünde Kabasakal mahallesi ahâlîsinden fahrü’l-akrân Ömer Ağa b. Ahmed hâlâ kāimmakām-ı sadâret-i uzmâ olan vezîr-i âsaf-nazar müşîr-i müşterî-tedbîr huzûrunda akd olunan meclis-i şer‘-i hatîr-i lâzimü’t-tevkīrde li-ebeveyn karındaşı işbu râfi‘ü’l-kitâb Mahmud Ağa mahzarında üzerine takrîr-i da‘vâ edip bundan akdem kendi malımdan bin esedî guruşla silk-i mülkümde muntazam emlâkimden her re’si üçer yüz guruş kıymetli üç re’s at ve bir sîm raht ve iki sîm gaddâre ve iki sîm kılıç karındaşım işbu Mahmud Ağa yedine alâ tarîkı’l-vedî‘a vaz‘ ve teslîm edip ol dahi vech-i muharrer üzere meblağ-ı mezbûr bin esedî guruşla eşyâ-i mezkûreyi yedimden ahz u kabz eyleyip hâlâ taleb eylediğimde bana teslîmden imtinâ‘ eder suâl olunup meblağ-ı mezbûr bin esedî guruşu ve zikrolunan raht ve gaddâre ve kılıçların aynıları mevcûd ise aynılarını değil ise te‘addîsi sebebiyle yevm-i istihlâkde kıymet-i şer‘iyyeleri alıverilmesi matlûbumdur dedikde gıbbe’s-suâl mezbûr Mahmud Ağa husûs-ı mezkûru bi’l-külliyye inkâr edicek müdde‘î-i mezkûrdan müdde‘âsını mübeyyine beyyine taleb olundukda ikāmet-i beyyineden izhâr-ı aczle istihlâf etmeğin müdde‘î-i mezbûr Ömer Ağa’nın müdde‘âsı olan bin esedî guruşla zikrolunan üç re’s at ve bir kemer raht ve iki gaddâre ve iki kılıç yedinde vedî‘a olmadığına ve ol vechile üzerinde müdde‘î-i mezbûrun hakkı olmadığına mezkûr Ömer Ağa talebiyle karındaşı mezbûr Mahmud Ağa’ya yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ edicek alâ kavli’l-muhtâr ikāmet-i beyyine edinceye değin mezbûr Ömer Ağa ta‘arruzdan men‘ olunup mâ-hüve’l-vâki‘ bi’t-taleb ketb olundu. Tahrîren fi’l-yevmi’l-hâmis ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Fahrü’l-akrân İvaz Ağa ser-muhzırân, Zahrü’l-akrân Mehmed Ağa b. Abdülmennân, Ali Beşe çukadâr, Hâcı Ca‘fer b. Abdullah ve gayruhüm mine’l-[hâzırîn.]