Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 193 Hüküm no: 141 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gülazar Hatun’un vakfettiği menzilin oturması için Seyyid Mustafa Efendi’ye verildiği Fazîletlü efendi hazretleri unvânları iledir. Mahmiye-i İstanbul’da Çavuş Mescidi mahallesinde vâki‘ ashâb-ı hayrâtdan Gülazar nâm hâtun vakıf ve süknâsını beher yevm birer sûre-i Yâsin tilâvet edip sevâbını rûhuna hibe etmek üzere bir recül-i sâliha şart ve ta‘yîn eylediği bir tarafdan Murad Ağa mülkü ve bir tarafdan İbrahim Çavuş Vakfı ve bir tarafdan ( ) Vakfı ve bir tarafdan tarîk-ı âm ile mahdûd muhavvata-i dâhiliyyesi iki bâb tahtânî odayı ve bir matbahı ve bir su kuyusunu ve muhavvata-i hâriciyyesi bir bâb odayı müştemil vakıf menzilin tevcîh-i hâkimü’ş-şer‘le mutasarrıfı olan Akkirmanî eş-Şeyh Ömer Efendi süknâya ihtiyâcı olma[ma]ğla hüsn-i ihtiyârı ile fâriğ olmağla sulehâdan olup süknâya eşedd-i ihtiyâc ile muhtâc olan mezbûr eş-Şeyh Ömer Efendi’nin rebîbi işbu sâhibü’l-kitâb es-Seyyid Mustafa Efendi’ye menzil-i mezbûr kıbel-i şer‘den tevcîh olunup tasarrufi’çün işbu vesîka-i enîka ketb ve yedine def‘ olundu. Fi’l-yevmi’s-sâlis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Umdetü’l-sâlikîn eş-Şeyh Ahmed Efendi, Abdi Bey el-cündi, Mustafa Çelebi, Mehmed b. Osman, Hüseyin Çelebi b. Osman, Ahmed Efendi b. Ömer, Ahmed Efendi b. Mehmed ve gayruhüm mine’l-[hâzırîn.]