Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 193 Hüküm no: 142 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Musa’nın Devrekani kazasındaki bazı emlak ve arazi hissesinin kullanım hakkını amcası oğlu Hasan b. Halil’e devrettiği Vilâyet-i Anadolu’da Kastamonu sancağında Devrekani kazâsına tâbi‘ Ulamışlı nâm karye sükkânından iken bundan akdem vefât eden Musa b. ( ) nâm kimesnenin verâseti sulbî kebîr oğulları Mahmud ve Mehmed ve Ebûbekir nâm kimesnelere münhasıra olduğu şer‘an zâhir ve mütehakkık oldukdan sonra mezbûr Mahmud meclis-i şer‘-i hatîr-i lâzimü’t-tevkīrde li-ebeveyn ammi oğlu bâ‘isü’l-vesîka Hasan b. Halil mahzarında ikrâr ve takrîr-i kelâm edip babam mezbûr Musa’dan müntakil olup karye-i mezbûrede vâki‘ bir tarafı Osman Hoca menziline ve bir tarafı Nuh Sofu nâm kimesne menziline ve bir tarafı mezbûr Hasan menziline ve bir tarafı tarîk-ı âmma müntehî menzilimiz ve yine karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd çayır yerleri ve yine karye-i mezbûrede vâki‘ mevâzi‘-i adîdede olup herbirinin hudûdu lede’l-ahâlî ma‘lûme olan tarlalarda olan sülüs hisse-i şâyi‘amı bi-cümleti’t-tevâbi‘ ve’l-levâhık elli kıt‘a riyâlî guruş bedel mukābilesinde ma‘rifet-i sâhib-i arz ile mezbûr Hasan’a ferâğ ve tefvîz ol dahi vech-i muharrer üzere tefevvüz ve kabûl eyledikden sonra bedel-i tefevvüz olan meblağ-ı mezbûr elli riyâlî guruşu mezbûr Hasan yedinden tamâmen ahz u kabz edip arâzi-i merkūmeyi mahallinde kabz ve tasarrufa mezbûr Hasan’ı taslît eyledim ba‘de’l-yevm arâzi-i merkūmede sülüs hisse-i şâyi‘am mezbûr Hasan’ın hakk-ı müfevvazıdır emsâli gibi mutasarrıf olsun dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Ali b. İbrahim, Ahmed b. Mustafa, Mehmed b. Bayram, İsmail b. Safâ, Mustafa Bey b. Halil, Himmet b. Şa‘ban, Mehmed b. Eyüb, Hüseyin b. Durak, Osman Beşe çukadâr, Ramazan Çelebi b. Mustafa ve gayruhüm mine’l-[hâzırîn.]