Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 205 Hüküm no: 159 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arzi bt. Yolcu’nun kocasından kalan miras hissesi ve mehri hususunda oğlu Hacı Mehmed’in zimmetini ibra ettiği Dâru’l-hilâfeti’l-aliyye Kostantıniyye el-mahmiyye mahallâtından Üskübi mahallesinde sâkin iken bundan [akdem] vefât eden el-Hâc Kaya b. İbrahim nâm kimesnenin verâseti zevce-i metrûkesi Arzi bt. Yolcu nâm hâtuna ve sulbî kebîr oğlu el-Hâc Mehmed’e ve sulbiye kebîre kızı Zeyni nâm hâtuna münhasıra olduğu şer‘an zâhir ve müte‘ayyin oldukdan sonra mezbûr Arzi Hâtun meclis-i şer‘-i hatîr-i lâzimü’t-tevkīrde işbu râfi‘ü’r-rakīm mezbûr Hâcı Mehmed mahzarında tâyi‘aten ikrâr-ı tâm ve takrîr-i kelam edip zevcim mezbûr el-Hâc Kaya vefât eyledikde terekesine oğlu mezbûr Hâcı Mehmed vaz‘-ı yed eylemekle müteveffâ-yı mezbûr zimmetinde mütekarrir ve ma‘kūdün-aleyh olan beş bin akçe mehr-i müeccelimi ve terekesinden dahi sümün hisse-i şer‘iyyem mukābilesinde isâbet eden dokuz bin nakid akçe ve iki beledî döşek ve iki yorgan ve iki kebe ve bir kaliçe ve bir tencere ve üç sahan ve bir kilimi tamâmen tereke-i müteveffâ-yı mezbûra vaz‘-ı yed eden Hâcı Mehmed yedinden ahz u kabz eyledim zevcim müteveffâ-yı mezbûrun ile’l-vefât yedinde ve taht-ı tasarrufunda olup mahmiye-i mezbûre hısnı ebvâbından Odunkapısı dâhilinde vâki‘ arsasının senede Çaker Ağa Vakfı’na elli akçe mukāta‘ası olan binâsı mülk iki bâb kundakçı dükkânlarının ebniyesinde olan sümün hisse-i şer‘iyyemden gayrı tereke-i müteveffâ-yı mezbûrda bir akçe ve bir habbe hakkım bâkī kalmadı eğer ba‘de’l-yevm tereke-i müteveffâ-yı mezbûra müte‘allika da‘vâ benden mezbûr Hâcı Mehmed üzerine sudûr ederse lede’l-hükkâmi’l-kirâm mesmû‘a ve makbûle olmaya dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Efendi b. Muharrem, Osman Beşe çukadâr, Mehmed b. Haydar, el-Hâc İskender b. ( ) ve gayruhüm mine’l-[hâzırîn.]