Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 206 Hüküm no: 161 Orijinal metin no: [23b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mircan v. Bedros’un’un Eğin kazasındaki bağını Mehmed Ağa b. Hüseyin Bey’e yüz guruşa sattığı Vilâyet-i Anadolu’da Eğin kazâsına tâbi‘ Şirzi nâm karye sükkânında Mircan v. Bedros nâm Ermeni mahfil-i kazâda işbu bâ‘isü’l-kitâb fahrü’l-akrân Mehmed Ağa b. Hüseyin Bey mahzarında bi’t-tav‘i’s-sâf ikrâr ve i‘tirâf edip silk-i mülk-i sahîhimde münselik olup karye-i mezbûre sınırı dâhilinde vâki‘ bir tarafdan Ramazan Bey b. Hüseyin bağına ve bir tarafdan Gülar v. Hadrik bağına ve bir tarafdan Agop v. Parom bağına ve bir tarafdan tarîk-ı âmma müntehî mülk bağımı bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile yüz kıt‘a riyâlî guruşa mezbûr Mehmed Ağa’ya bey‘ ol dahi vech-i muharrer üzere iştirâ ve kabûl eyledikden sonra semeni olan meblağ-ı mezbûr yüz kıt‘a riyâlî guruşu müşterî-i mezbûr Mehmed Ağa yedinden ahz u kabz edip mebî‘-i mezbûru mahallinde zabt u tasarrufa mezbûr Mehmed Ağa’yı taslît eyledim ba‘de’l-yevm zikrolunan bağ-ı mezbûr Mehmed Ağa’nın mülk-i müşterâsıdır keyfe mâ yeşâ ve yahtâr mutasarrıf olsun dedikde mezbûr Mehmed Ağa dahi vicâhen tasdîk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâdis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: İbrahimAğa b. Hüseyin Bey, Ramazan Ağa b. Hüseyin Bey, Osman Bey b. Abdullah, Seydi Beşe b. Mustafa, Mustafa Bey b. Ali Beşe, Mustafa Beşe b. Osman Bey, Murtaza Çelebi b. Ramazan Bey ve gayruhüm.