Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 207 Hüküm no: 162 Orijinal metin no: [23b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mehmed b. Hacı Veli’nin Mostar’a bağlı Zanoş köyündeki çiftliği ile bazı arazisini bir seneliğine Mehmed Bey b. Hacı Ahmed’e kiraladığı Vilâyet-i Rumeli’nde Hersek sancağında vâki‘ Mostar kazâsına tâbi‘ Zanoş nâm karye sâkinlerinden el-Hâc Mehmed b. el-Hâc Veli meclis-i şer‘-i hatîrde işbu sâhibü’l-kitâb Mehmed Bey b. el-Hâc Ahmed nâm cündi mahzarında tav‘an ikrâr ve i‘tirâf edip zikrî âtî akdin sudûruna değin silk-i mülkümde muntazam yedimde mülk ve hakkım olup karye-i mezbûrede vâki‘ bir tarafı Hubanzâne demekle ma‘rûf Mahmud Beşe ve bir tarafı Alaybeyzâde demekle şehîr Mustafa Bey mülklerine ve iki tarafı tarîk-ı âmma müntehî kayağan pûşîde bir bâb beyt-i süfîfi ve bir tahta sundurmayı ve bir samanlığı ve eşcâr-ı müsmiresiyle bir kıt‘a bahçeyi müştemil çiftlik ta‘bîr olunur menzili ve çiftlik-i mezbûr kurbünde vâki‘ inde’l-ahâlî ve’l-cîrân hudûdu ma‘lûme kırk çapalık altı kıt‘a mülk bağlarımı kâffe-i hukūk ve merâfıkı ile bi-safkatin vâhidetin târih-i kitâbdan sene-i kâmile tamâmına değin bey‘ bi’l-vefâ ile mezbûr Mehmed Bey’e yedi bin beş yüz fıddî râyic [fi’l]-vakt akçeye bey‘ edip ol dahi vech-i muharrer üzere iştirâ ve kabûl eyledikden sonra zikri mürûr eden çiftlik ile ma‘an tasarruf olunup karye-i mezbûre sınırı dâhilinde mevâzi‘-i müteferrikada vâki‘ hudûdu beynimizde ilm-i şer‘î ile ma‘lûm tahmînen yirmi beş keyl tohum isti‘âb eder yedi kıt‘a tarlalarımın ve Bilode demekle ma‘rûf mahalde vâki‘ yaylakda olan hissemin dahi hakk-ı tasarruflarını ma‘rifet-i sâhib-i arz ile merkūm Mehmed Bey’e yedi bin beş yüz akçe bedel mukābilesinde tefvîz bi’l-vefa tarîkı üzere ferâğ ve tefvîz ol dahi minvâl-i muharrer üzere tefevvüz ve kabûl eyledikden sonra semeni mezbûr yedi bin beş yüz akçe ile bedel-i merkūm yedi bin beş yüz akçe ki cem‘an on beş bin akçeyi mezkûr Mehmed Çelebi yedinden tamâmen ahz u kabz edip zikrolunan emlâk ve arâziyi mahallinde zabt u tasarrufa mezkûr Mehmed Bey’i taslît eyledim dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Şa‘ban Efendi b. Ebûbekir, Osman Bey b. Ahmed el-cündi, Durak Bey b. Hasan, Hasan Efendi b. Nasûh, Ahmed Efendi b. Mehmed ve gayruhüm mine’l-[hâzırîn.]