Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 219 Hüküm no: 175 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhume Şerife Sakine Hatun’dan intikal eden menzilin varisleri olan kız kardeşleri Şerife Emetullah ile Şerife Zahide hatunlar arasında paylaştırıldığı Mahmiye-i İstanbul’da Karagümrük kurbünde Ali Paşa-yı atîk mahallesinde sâkine iken vefât eden merhûme Şerife Sâkine Hâtun bt. Nimetullah’ın verâseti li-ebeveyn kız karındaşları Şerife Emetullah ve Şerife Zâhide nâm hâtunlara münhasıra olduğu şer‘an mütehakkık oldukdan sonra mûmâ-ileyhâ Şerife Emetullah Hâtun’un sadrî kebîr oğlu ve tarafından husûs-ı âti’l-beyânı ikrâra vekîli olup mûmâ-ileyhâyı ma‘rifet-i şer‘iyye [ile] ârifân olan Hasan Efendi b. Mustafa ve İbrahim Çelebi b. Süleyman şehâdetleri ile şer‘an vekâleti sâbite olan umdetü’l-kuzâti’l-İslâm es-Seyyid Mustafa Efendi b. Ali meclis-i şer‘-i hatîr-i lâzimü’t-tevkīrde müşârun-ileyhâ Şerife Zâhide Hâtun’un sadrî kebîr oğlu ve tarafından ikrâr-ı âti’l-beyânı tasdîka vekîl olup şâhidân-ı mezkûrân şehâdetleri ile vekâleti sâbite olan zahrü’l-kuzât es-Seyyid Abdülvehhâb b. Abdulbâki mahzarında bi’l-vekâle tav‘an ikrâr ve i‘tirâf edip müteveffâ-yı mezkûre Şerife Sâkine Hâtun’un terekesinden olup mahalle-i mezkûrede vâki‘ bir tarafdan benim mülküme ve bir tarafdan vekîl-i mezbûr Seyyid Abdülvehhâb Efendi mülküne ve bir tar[afdan] bazen müvekkilem mûmâ-ileyhâ Şerife Emetullah Hâtun mülküne ve bazen tarîk-ı âmma ve bir tarafdan tarîk-ı âmma müntehî olup bir bâb tahtânî kitâbhâne odasını ve önünde cüneyneyi ve bir su kuyusunu ve matbahı ve bir tahtânî büyük odayı ve iki sofayı ve önünde bir mikdâr arsayı ve kenîfi müştemil olan cemî‘ menzil müvekkilem mezbûre Emetullah Hâtun ile kız karındaşı mezkûre Zâhide Hâtun’un ale’l-iştirâki’s-seviyye mülk-i mevrûsları olup mutasarrıfeler iken hâlâ beynlerinde bi’t-terâzî iktisâm-ı şer‘î vâki‘ olup benim mülküm ile tarîk-ı âm tarafından vâki‘ zikrolunan kitâbhâne odası ve önünde cüneyne ve su kuyusu ve sokak kapısı ve matbah müvekkilem mezbûre Emetullah Hâtun’ın nısf hisse-i şer‘iyyesi için ve vekîl-i mezbûr es-Seyyid Abdülvehhâb Efendi mülkü ile bazen tarîk-ı âm ve bazen mezkûre Emetullah Hâtun’un mülkü tarafında vâki‘ büyük tahtânî oda ve iki sofa ve kenîf müvekkile-i mezbûre Şerife Zâhide Hâtun’un nısf [hisse-i] şer‘iyyesi için ifrâz olunup zikrolunan kenîf duvarı köşesinden oda mukābilesinde vâki‘ incir ağaç dibinden benim mülküm olan duvarda vâki‘ büyük direğe varınca beynlerinde alâmât-ı fâsıla vaz‘ olunup ba‘de’l-yevm menzil-i mezkûra müte‘allik da‘vâdan herbiri âharın zimmetini ibrâ-i âmm-ı kātı‘u’n-nizâ‘la ibrâ ve ıskāt eylediler dedikde vekîl-i mûmâ-ileyh es-Seyyid Mustafa Efendi’yi vech-i meşrûh üzere bi’l-vekâle cârî ve sâdır olan ikrârında vekîl-i mezbûr es-Seyyid Abdülvehhâb Efendi vicâhen tasdîk ve şifâhen tahkīk edicek mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Ahmed Efendi b. Yusuf el-imâm, Zahrü’l-kuzât Mehmed Efendi, Mehmed Çelebi b. Hasan, Halil Çelebi b. ( ) hallâk, Ali Beşe b. Abdullah ve gayruhüm mine’l-[hâzırîn.]