Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 218 Hüküm no: 174 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın tasarrufunda olan Yakup Ağa Vakfı’na ait arsa üzerine kendi malıyla yaptırdığı yeni binaların varisi olan kardeşi Ahmed’e intikal ettiği Vilâyet-i Anadolu’da vâki‘ Avlak kazâsına tâbi‘ Ovacık nâm karyeden olup bundan akdem mahmiye-i İstanbul’da Silivrikapısı kurbünde vâki‘ İbrahim Paşa mahallesi sükkânından iken vefât eden Mustafa Ağa b. el-Hâc Hayreddin nâm bostanînin verâseti li-ebeveyn karındaşları Ahmed ve Mehmed nâm kimesnelere münhasıra olup ba‘dehû merkūm Mehmed dahi vefât edip verâseti ancak li-ebeveyn karındaşı mezkûr Ahmed’e münhasıra olduğu kazâ-i Avlak kādısı olan Mevlânâ es-Seyyid Mustafa Efendi b. es-Seyyid Hüseyin kıbelinden vârid olan nakl-i şer‘î ile isbât oldukdan sonra merkūm Ahmed meclis-i şer‘-i hatîr-i lâzimü’t-tevkīrde mahmiye-i mezbûrede vâki‘ merhûm Ya‘kub Ağa Vakfı’na bi’l-fi‘il mütevellî olup zikri âtî vakıf odalara bi’t-tevliye vâzı‘u’l-yed olan Abdülkerim Bey b. Ali nâm bevvâb-ı sultânî mahzarında üzerine takrîr-i da‘vâ edip vakf-ı mezbûr akārâtından olup mahmiye-i mezbûrede Sarıdemirci mahallesinde vâki‘ bir tarafdan Hoca Ali Vakfı’na ve bir tarafdan Kepenekçi Sinan Vakfı’na ve iki tarafdan tarîk-ı âmma müntehî olan Yahudihâne ta‘bîr olunur altı bâb fevkānî oda ile bir mikdâr arsa-i hâliye ma‘rifet-i mütevellî-i vakf-ı mezbûr ile icâre-i mu‘accele-i ma‘lûme ve yevmî dörder akçe icâre-i müeccele ile karındaşım ve mûrisim müteveffâ-yı mezbûr Mustafa Ağa’nın taht-ı tasarrufunda hakk-ı müveffezi iken karındaşım merkūm Mustafa Ağa zikrolunan arsa-i hâliye üzerine izn-i mütevellîsiz mâlı ile nefsi’çün iki bâb fevkānî oda ile bir attâr dükkânını müceddeden binâ ettiğinden mâ‘adâ altı bâb odanın binâ-yı kadîmî üzerine kezâlik altı bâb oda binâ ve ihdâs edip fevt oldukda verâseti benim ile âhar karındaşı mezkûr Mehmed’e münhasıra olmağla ebniye-i meşrûhanın nısfı bana ve nısf-ı âharı mezbûr Mehmed’e irsle intikāl edip mezbûr Mehmed dahi vefât edip verâseti ancak bana münhasıra olmağla ebniye-i meşrûhasından nısf hissesi dahi irsle bana intikāl edip cemî‘ ebniye-i meşrûha benim mülk-i mevrûsum ve hakk-ı sırfım iken mezbûr Abdülkerim Bey karındaşım merkūm Mustafa Ağa bilâ-veled vefât edip zikrolunan odaların ebniye-i kadîmesi intikāl-i âdî ile vakfa intikāl etmekle ebniye-i cedîde-i meşrûhayı dahi vakfa intikāl eder zu‘mu ile bi-gayrı hakkın zabt eylemişdir suâl olunup ebniye-i cedîde-i meşrûhadan kasr-ı yed edip kal‘ı vakfa zarar vermez ise kal‘ ve bana teslîm eylemesi matlûbumdur dedikde gıbbe’s-suâl mezbûr Abdülkerim Bey cevâbında fi’l-hakīka mütevellîsi olduğum vakfın akārâtından olup mahmiye-i mezbûrede mezkûr Sarıdemirci mahallesinde vâki‘ hudûd-ı mezkûre ile mahdûde olup Yahudihâne ta‘bîr olunan altı bâb oda ile bir mikdâr arsa-i hâliye ma‘rifet-i mütevellî-i vakf-ı mezbûr ile icâre-i mu‘accele-i ma‘lûme ve beher yevm dörder akçe icâre-i müeccele ile merkūm Mustafa Ağa’nın taht-ı yedinde ve tasarrufunda iken mezbûr Mustafa Ağa zikrolunan arsa-i hâliye üzerine iki bâb fevkānî oda ile bir attâr dükkânı binâ edip ve altı bâb odanın dahi binâ-i kadîmî üzerine kezâlik altı bâb fevkānî odaları mâlı ile binâya şürû‘ etdikde merkūm Mustafa Ağa ebniye-i meşrûhayı vakfa teberru‘ ve teslîmini işhâdet bilâ-veled fevt oldukda zikrolunan odaların ebniye-i kadîmesi ve ebniye-i cedîdesi bi’l-külliyye intikāl-i âdî ile vakfa intikāl etmekle tevliyetim hasebiyle vakıf için zabt eyledim bu vech ile müdde‘î-i merkūm Ahmed da‘vâ-yı meşrûhasında mubtildir deyu da‘vâ-yı def‘le mukābile edicek gıbbe’l-istintâk merkūm Ahmed karındaşı müteveffâ-yı mezbûr Mustafa Ağa’nın ebniye-i meşrûhayı teberru‘unu bi’l-külliyye inkâr edicek mütevellî-i merkūm Abdülkerim Bey’den def‘-i meşrûhunu mübeyyine beyyine taleb olundukda ityân-ı beyyineden izhâr-ı acz edip müdde‘î-i merkūm Ahmed’e karındaşı ve mûrisi müteveffâ-yı mezbûr Mustafa Ağa ebniye-i cedîde-i meşrûhayı ba‘de’l-binâ vakfa teberru‘unu adem-i ilmine yemîn teklîf olundukda ol dahi hasbe’l-mes’ûl yemîn billâhi’l-aliyyi’l-a‘lâ edicek vâki‘-i hâl hıfzan li’l-mekāl bi’t-taleb ketb olundu. Fi’l-yevmi’r-râbi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mehmed Ağa b. Osman, Mustafa Bey b. Müstedam, Şa‘ban b. Satılmış, Ahmed Beşe b. Derviş b. ( ) el-bostânî, Osman b. Haydar Hayreddin, Osman Beşe çukadâr ve gayruhüm mine’l-[hâzırîn.]