Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 221 Hüküm no: 177 Orijinal metin no: [26a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ramazan’ın sattığı cariye bedelinden Esirci Ümmühani bt. Muharrem’den yüz yirmi guruş alacağı olduğu Mahmiye-i İstanbul’da Ali Paşa-yı atîk mahallesi sâkinelerinden sâhibetü hâze’l-kitâb Âişe bt. Ramazan nâm hâtun meclis-i şer‘-i hatîr-i lâzimü’t-tevkīrde esirci tâifesinden Ümmühani bt. Muharrem nâm hâtun mahzarında üzerine da‘vâ edip merkūme Ümmühani Hâtun zimmetinde mülküm olup yedimden iştirâ ve kabz eylediği orta boylu açık kaşlı elâ gözlü Rusiyyetü’l-asl Marya câriye semeninden yüz yirmi riyâlî guruş hakkım vardır suâl olunup meblağ-ı merkūm yüz yirmi riyâlî guruş hakkımın merkūme Ümmühani’den alıverilmesini taleb ederim dedikde gıbbe’s-suâl merkūme Ümmühani cevâbında fi’l-hakīka müdde‘iye-i merkūme Âişe’ye mülkü olup yedinden iştirâ ve kabz eylediğim câriye-i mevsûfe-i mezkûre semeninden yüz yirmi riyâlî guruş lâzimü’l-edâ ve vâcibü’l-kazâ deynim vardır dedikde i‘tirâfı mûcebince meblağ-ı merkūm yüz yirmi riyâlî guruşu müdde‘iye-i mezbûre Âişe’ye edâ ile merkūme Ümmühani üzerine ilzâm-ı sahîh-i şer‘î kılınıp mâ-hüve’l-vâki‘ bi’t-taleb ketb olunup men lehü’t-taleb yedine def‘ olundu. Fi’l-yevmi’t-tâsi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Efendi keşfî, Çukadâr Osman Beşe b. Sevindik, Mustafa Çelebi b. Âsaf el-muhzır, İsa Bey b. Ahmed ve gayruhüm mine’l-[hâzırîn.]