Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 261 Hüküm no: 219 Orijinal metin no: [32a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi b. Mehmed’in tasarrufunda olduğunu ikrar ettiği Osman b. Mustafa’ya ait çayır ile bazı çiftlik aletlerini ve hayvanlarını iade etmeye söz verdiği Medîne-i Ebî Eyyûb-i Ensârî muzâfâtından Terkos nâhiye[sine] tâbi‘ Kete nâm karyede sâkin Osman b. Mustafa tarafından husûs-ı âti’l-beyânı ikrâra vekîl olup mahmiye-i İstanbul’da Mismarî Şücâ‘ mahallesi sükkânından Hüseyin Beşe b. Abdullah ve Ahmed Beşe b. Yusuf şehâdetleri ile şer‘an vekâleti sâbite olan vâlidesi Âmine bt. Mehmed nâm hâtun meclis-i şer‘de hâlâ zevci olan işbu bâ‘isü’l-kitâb Abdi b. Mehmed nâm kimesne mahzarında bi’l-vekâle tav‘an ikrâr ve i‘tirâf edip müvekkilim oğlum mezbûrun babası olup fevt olan İsmail’in ma‘rifet-i mütevellî ile taht-ı tasarrufunda olmağla ba‘de vefâtihî intikāl-i âdî ile oğlum müvekkilim mezbûra intikāl edip karye-i mezbûrede vâki‘ bir tarafı hâlâ Dâru’s-sa‘âde ağası olan mu‘temedü’l-mülûk ve’s-selâtîn Dilaver Ağa b. Abdülmennân mülkü ve iki tarafı Râbia Hâtun tarlası ve bir tarafı tarîk-ı am ile mahdûd olan bir kıt‘a vakıf çayırın zevcim merkūm Abdi bi-gayri vech-i şer‘î zabt ettiğinden mâ‘adâ babası müteveffâ-yı mezbûrun terekesinden olup oğlum mezbûra irsle intikāl eden üç re’s karasığır öküzünü ve üç karasığır ineğini ve bir re’s karasığır danasını ve altı çit samanını ve beynimizde ilm-i şer‘î ile ma‘lûm çiftlik âlâtını dahi bi-gayrı hakkın gasb ve ahz etmişidi hâlâ oğlum mezbûr Osman zafer bulup zikrolunan çayırı aynı ile ve sâir hayvanât ve âlât-ı zirâat ve harâset ve hubûbât ve samanın aynıları mevcûd ise [32b] aynılarına istihlâk etdi ise yevm-i ahzında kıymetlerini merkūm Abdi’den taleb etdikde merkūm Abdi zikrolunan çayır hâlâ yedinde ve tasarrufunda olduğuna tav‘an i‘tirâf ve mahallinde teslîme ta‘ahhüd ettiğinden mâ‘adâ zikrolunan yedi re’s hayvanâtdan ancak bir inek ve bir dana ve bir tosun ve altı çit saman ve kırk beş keyl alef kabz ettiğini i‘tirâf ve i‘tirâfı üzere zikrolunan üç re’s hayvanâtı ve zikrolunan samanı ve zikrolunan alefi karye-i mezbûrede oğlum merkūma teslîme ta‘ahhüd edip mâ‘adâyı inkâr etmekle beynlerinde nizâ‘-ı küllî vukū‘undan sonra oğlum mezbûr Osman merkūm Abdi’nin zimmetini inkâr ettiği dört re’s hayvanât ile sâir eşyâ da‘vâsından ibrâ-i âmm-ı kātı‘u’n-nizâ‘la ibrâ ve ıskāt eyledi min ba‘d müvekkilim ve oğlum mezbûrun merkūm Abdi üzerine da‘vâ ve hakkı kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’l-hâmis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mahmud Çavuş b. Ali, Mustafa Çelebi b. Ali, Halil Beşe b. Ali, Mustafa b. Mehmed, Osman Beşe çukadâr, İsa Bey b. Ahmed, Mehmed b. Haydar ve gayruhüm.