Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 260 Hüküm no: 218 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstani v. İstati’nin kendisinden haksız yere para aldığı iddiasıyla Yedekci Mehmed Ağa b. Abdülmennan aleyhine açtığı davada iki yüz akçe üzerine sulh olduğu Fazîletlü efendi hazretlerinin imzâsıyladır. Medîne-i Sakız kazâsına tâbi‘ Eksopotimo nâm karye ahâlîsinden İstani v. İstati nâm zimmî meclis-i şer‘-i hatîr-i lâzimü’t-tevkīrde mahrûse-i Galata kazâsına tâbi‘ kasaba-i Tophane mahallâtından Hendek mahallesinde sâkin işbu sâhibü’l-kitâb Yedekci Mehmed Ağa b. Abdülmennân mahzarında tav‘an ikrâr ve i‘tirâf edip mezkûr Mehmed Ağa târih-i kitâbdan beş sene mukaddem Sakız ağası olduğu hâlde yedimden ve malımdan üç yüz kıt‘a riyâlî guruşumu bi-gayri vech-i şer‘î ahz eyledi deyu taleb ve da‘vâ eylediğimde ol dahi inkâr edip benim dahi beyyinem olma[ma]ğla beynimizde münâza‘ât-ı kesîre ve muhâsamât-ı ekîde vâkı‘a olmuşidi el-hâletü hâzihî beynimize muslihûn tavassut edip da‘vâ-yı mezkûremden beni mezkûr Mehmed Ağa ile an-inkâr iki yüz nakd-i râyic [fi’l]-vakt akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezkûr iki yüz akçeyi mezkûr Mehmed Ağa yedinden tamâmen ahz u kabz edip husûs-ı mezbura müte‘allika da‘vâdan mezkûr Mehmed Ağa’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d husûs-ı mezbûra müte‘allika mezkûr Mehmed Ağa üzerine bi-vechin mine’l-vücûh ve sebebin mine’l-esbâb da‘vâ ve nizâ‘ ve husûmet ve hak ve alâkam kalmadı dedikde gıbbe’t-tasdîk mâ-hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Efendi el-müderris, Mustafa Efendi el-kādî, Kethüdâ Mahmud Ağa b. Abdullah, İbrahim Çavuş b. Abdullah, Matbahî İsmail Çelebi, Ali Bey el-muhzır ve gayruhüm mine’l-[hâzırîn.]