Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 262 Hüküm no: 221 Orijinal metin no: [32b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Sefer Efendi b. Nasuh’un Hüseyin Çelebi b. Hasan’a emanet ettiği yirmi dört guruşun varisi Maksud b. Ahmed’e ödenmesi Fi’l-asl Vilâyet-i Anadolu’da Karahisar-ı Şarkī sancağında Bolaman kazâsına tâbi‘ Derecik nâm karyeden olup Havâss-ı aliyye kazâsı muzâfâtından Büyükçekmece kasabasında sâkin iken vefât eden Sefer Efendi b. Nasûh’un li-ebeveyn ammisi ve hasrân vârisi olduğu nakl-i şer‘î ile sâbit olan Maksud b. Ahmed tarafından kezâlik nakl-i şer‘î ile husûs-ı âti’l-beyâna [vekîl-i] sâbitü’l-vekâlesi olan Süleyman b. Hasan nâm kimesne meclis-i şer‘-i hatîr-i lâzimü’t-tevkīrde mahmiye-i İstanbul’da Yenibahçe kurbünde Karabaş mahallesi ahâlîsinden Hüseyin Çelebi b. Hasan mahzarında bi’l-vekâle üzerine takrîr-i da‘vâ edip müteveffâ-yı mezbûr Sefer Efendi hâl-i hayâtında kendi malından mezbûr Hüseyin Çelebi’ye vedî‘at üzere yedine vaz‘ ve teslîm eylediği iki yüz riyâlî guruşun yüz kırk guruşunu mezbûr Hüseyin Çelebi yedinden hâl-i hayâtında bi’d-defe‘ât ahz u kabz edip mâ‘adâsı olan altmış riyâlî guruş kable’t-teslîm vefât etmekle yedinde kalmışidi hâlâ vekâletim hasebiyle meblağ-ı bâkī altmış guruşu mezbûr Hüseyin Çelebi’den suâl olunup alıverilmesi matlûbumdur dedikde gıbbe’s-suâl mezbûr Hüseyin Çelebi cevâbında fi’l-vâki‘ müteveffâ-yı mezbûr Sefer Efendi hâl-i hayâtında kendi malından bana iki yüz riyâlî guruşunu alâ tarîkı’l-vedî‘a yedime def‘ ve teslîm edip ben dahi yedinden ahz u kabz eylediğimden sonra meblağ-ı mezkûrun yüz altmış guruşunu mezbûr Sefer Efendi hâl-i hayâtında bi’d-defe‘ât yedimden ahz u kabz edip kırk riyâlî guruş yedimde bâkī kalıcak meblağ-ı bâkī kırk guruşun on yedi guruşu târih-i kitâb Ramazân-ı şerîfinden üç [gün] mukaddem hâl-i hayâtında mezbûr Sefer Efendi yedimden ahz u kabz edip mâ‘adâsı olan yirmi dört riyâlî guruş hâlâ yedimdedir deyu mâ‘adâyı def‘ ile mukābile edicek müteveffâ-yı mezbûr Sefer Efendi’den hâl-i hayâtında yedinde vedî‘a tarîkı üzere vaz‘ ve teslîm eylediği iki yüz riyâlî guruşdan yirmi dört guruşdan ziyâde üzerinde ve kıbelinde müvekkil-i mezbûr Maksud’un hakkı olmadığına mezbûr Hüseyin Çelebi yemînle tasdîk olunmağın vekîl-i mezbûr talebiyle yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ edicek zikrolunan yirmi dört guruşdan ziyâde talebinden vekîl-i mezbûr men‘ olunup mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Yahya b. Hasan, Ali Efendi b. Mehmed, Mustafa Beşe mübâşir, İsmail b. Yunus, Osman Beşe çukadâr, İsa Bey b. Ahmed, Mehmed b. Haydar ve gayruhüm mine’l-[hâzırîn.]