Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 263 Hüküm no: 222 Orijinal metin no: [32b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Çelebi b. Seyyid Mehmed’in cariye bedelinden İsmihan bt. Mehmed’de yüz guruş alacağı olduğu Mahmiye-i İstanbul’da Sekbânbaşı Ya‘kub Ağa mahallesinde sâkin Küçük Emîr demekle ma‘rûf es-Seyyid Mehmed Çelebi b. es-Seyyid Mehmed meclis-i şer‘-i hatîr-i lâzimü’t-tevkīrde Kantarkızı demekle ma‘rûfe İsmihan bt. Mehmed nâm hâtun mahzarında üzerine takrîr-i da‘vâ edip işbu hâzır bi’l-meclis olan Esirci Mahmud’un silk-i mülkünde muntazam evsâfı ma‘lûme Gürciyyetü’l-asl bir câriyesini mezbûr Esirci Mahmud’un emriyle mezkûr İsmihan Hâtun’a yüz riyâlî guruşa bey‘ ve teslîm edip ol dahi vech-i muharrer üzere iştirâ ve tesellüm eyleyip semeni olan meblağ-ı mezkûr hâlâ mezkûre İsmihan Hâtun’un zimmetindedir suâl olunup alıverilmesi matlûbumdur dedikde gıbbe’s-suâl mezbûre İsmihan cevâbında fi’l-vâki‘ müdde‘î-i mezbûr es-Seyyid Mehmed Çelebi yedinden işbu hâzır bi’l-meclis mezbûr Esirci Mahmud’un zikrolunan Gürciyyetü’l-asl bir câriyesini yüz riyâlî guruşa iştirâ ve tesellüm eyleyip hâlâ semen-i mezkûr yüz riyâlî guruş mezkûr es-Seyyid Mehmed Çelebi’ye zimmetimde lâzimü’l-edâ deynim vardır deyu bi-tav‘ihâ ikrâr ve i‘tirâf etmeğin mezkûre İsmihan’ın ikrârı mûcebince meblağ-ı mezkûru müdde‘î-i mezbûr es-Seyyid Mehmed Çelebi’ye edâ ve teslîme mezkûre İsmihan üzerine ilzâm olunup mâ-hüve’l-vâki‘ bi’t-taleb ketb olundu. Tahrîren fi’l-yevmi’l-hâmis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: İsa Bey b. Ahmed, el-Hâc Ca‘fer b. Abdullah, Ahmed Çelebi b. Abdülkerim, Osman Beşe çukadâr, Mehmed Çelebi b. Haydar ve gayruhüm mine’l-[hâzırîn.]