Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 265 Hüküm no: 224 Orijinal metin no: [33a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haffaf İbad b. Nazar’ın atı ile yaralanmasına sebep olduğu Yanci v. Yorgi ile beş guruş üzerine sulh olduğu Mahmiye-i İstanbul’da Lütfi Paşa kurbünde Defterdâr Ahmed Çelebi mahallesi sükkânından olup Büyükkaraman’da eskici haffâflarından olan İbad b. Nazar meclis-i şer‘-i hatîr-i lâzimü’t-tevkīrde mahmiye-i mezbûrede Tercümân Yunus mahallesinden olan hâmilü hâze’l-kitâb Yanci v. Yorgi nâm Nasrânî muvâcehesinde tav‘an ikrâr ve i‘tirâf edip merkūm Yanci târih-i kitâb günü merhûm Ebû’l-feth Sultân Mehmed Hân aleyhi’r-rahmetü ve’l-gufrân câmi‘-i şerîfi hareminde at koşar iken atı zabt edemeyip bana dokunmağla ben dahi yıkılıp elim kaldırım taşına dokunup mecrûh olduğumda merkūm Yanci’den mûcib-i cerhimi taleb ve da‘vâ ettiğimde beynimize muslihûn tavassut edip merkūm Yanci ile beni da‘vâ-yı mezkûremden beş kıt‘a riyâlî guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru yedinden ahz u kabz edip da‘vâ-yı mezkûremden merkūmun zimmetini ibrâ ve ıskāt ettiğimden mâ‘adâ cerh-i mezbûrun te’sîrinden fevt olursam dahi dem ve diyetime müte‘allik âmme-i de‘âvîden ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d merkūm Yanci üzerine husûs-ı mezbûra müte‘allik bi-vechin mine’l-vücûh ve sebebin mine’l-esbâb da‘vâ ve hakkım yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Haffâf Mustafa Beşe b. Mehmed, Tercümânzâde Mehmed Çavuş b. Zülfikar, Çukadâr Ali Beşe, Osman Beşe b. Sevindik ve gayruhüm.