Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 265 Hüküm no: 225 Orijinal metin no: [33a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yormanoz v. Torkatimyos’un terekesinden haksız yere eşya ve para aldığını ikrar eden kardeşi oğlu Torkatimyos’un aldığı para ve eşyaları varislerine iadesine karar verildiği Havâss-ı aliyye kazâsı muzâfâtından Midye nâm kasaba ahâlîsinden iken bundan akdem hâlik olan Yormanoz v. Torkatimyos nâm zimmînin verâseti zevce-i metrûkesi Kirano bt. Yorgi nâm Nasrâniye’ye ve sulbiye kebîre kızları İrine ve Tokita nâm Nasrâniyelere ve li-ebeveyn kız karındaşları Marola ve Dukana ve Romake’ye münhasıra olduğu ve tereke-i hâlik-i mezbûr yetmiş iki sihâm i‘tibâr olunup sihâm-ı mezkûreden dokuz sehmi zevcesi mezkûre Kirano’ya ve yirmi dörder sehmi kızları merkūmetân İrine ve Tokita’ya ve beşer sehmi kız karındaşları mezkûrât Marola ve Dukana ve Romake’ye isâbet eylediği şer‘an mütebeyyin oldukdan sonra mezkûre Kirano kendi tarafından asâleten ve kızları merkūmetân İrine ve Tokita ve mezkûrât Marola ve Dukana ve Romake’ye taraflarından husûs-ı âti’l-beyâna vekîlleri olup mezkûrâtı ma‘rifet-i şer‘iyye ile ârifeyn olan kasaba-i mezkûre ahâlîsinden Yako v. Nikola ve Dimitri v. Kaloyani nâm zimmîler şehâdetleri ile vekâleti sâbite oldukdan sonra vekâleten meclis-i şer‘-i hatîr-i lâzimü’t-tevkīrde zevci ve mûrisi hâlik-i mezbûr Yoramanoz’un karındaşı olup kendiden evvel hâlik olan Dimitri’nin sulbî kebîr oğlu Torkatimyos nâm zimmî muvâcehesinde üzerine takrîr-i da‘vâ edip mezbûr Torkatimyos zevcim ve mûrisim hâlik-i mezbûr Yormanoz’un verâseti olmak zu‘mu ile bi-gayri vech-i şer‘î terekesinden beş bin akçe kıymetli balık ağlarını ve yedi bin akçe kıymetli bir kayığını ve bin beş yüz [akçe] kıymetli bir re’s beyaz katırını ve bin akçe kıymetli iki kebesini ve beş yüz akçe kıymetli bir tilki kürkünü ve bir gümüşlü bıçak kını ve bir göğ sarık ve beş zirâ‘ keten bezi ve yedi keyl buğdayını ahz u kabz eylediğinden mâ‘adâ kızım ve müvekkilem mezbûre İrine’nin zevci işbu hâzır bi’l-meclis olan Yorgi nâm zimmî yedinden dahi bin sekiz yüz akçeyi nâ-hak ahz u kabz eyledi suâl olunup tereke-i hâlik-i mezbûrdan nâ-hak ahz eylediği eşyâ-i mezkûre ile meblağ-ı mezkûre bin sekiz yüz akçeyi mezbûr Torkatimyos’dan taleb ederim suâl olunsun dedikde gıbbe’s-suâl mezbûr Torkatimyos cevâbında fi’l-vâki‘ hâlik-i mezbûrun verâseti olmak zu‘mu ile terekesinden beş bin akçe kıymetli balık ağını ve yedi bin akçe kıymetli bir kayığını ve bin beş yüz [akçe] kıymetli bir re’s katırını ve bin akçe kıymetli iki kebesini ve beş yüz akçe kıymetli bir tilki kürkünü ve bir gümüş bıçak kınını ve bir göğ sarığını ve beş zirâ‘ keten bezini ve mezbûr Yorgi yedinden bin sekiz yüz nakid akçe ahz u kabz eyledim deyu eşyâ-i mezkûre ile meblağ-ı mezbûr bin sekiz yüz akçeyi vech-i muharrer üzere ahz u kabzını ikrâr edip zikrolunan yedi keyl buğdayı ahz eylediğini inkâr etmeğin tereke-i hâlik-i mezbûrdan ikrârı mertebesi olan eşyâ-i mezkûre ile meblağ-ı mezbûr bin sekiz yüz akçeyi vekîl-i mezbûre Kirano’ya teslîme mezbûr Yorkatimyos’u tenbîh birle mâ-hüve’l-vâki‘ bi’t-taleb ketb olundu. Tahrîren fi’l-yevmi’s-sâbi‘ aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: İbrahim Çavuş b. Abdullah el-mübâşir, el-Hâc Ca‘fer b. Abdullah, İsa Bey b. Ahmed, Ahmed Çelebi b. Abdülkerim, Osman Beşe çukadâr, Mehmed Çelebi b. Haydar ve gayruhüm mine’l-[hâzırîn.]