Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 281 Hüküm no: 243 Orijinal metin no: [35b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuyumcu Avanis v. Sihak’ın Çoban Çavuşbaşı Süleyman Ağa mahallesindeki menzilini karısı Melek bt. İsador’a beş yüz guruşa sattığı Husûs-ı âti’l-beyânın mahallinde tahrîri iltimâs olunmağın savb-ı şer‘-i hatîrden Mevlânâ Mehmed Efendi b. Veli Efendi irsâl olunup ol dahi mahmiye-i İstanbul’da Çoban Çavuşbaşı Süleyman Ağa mahallesinde sâkin olup kuyumcu tâifesinden olan Avanis v. Sihak nâm Ermeni’nin menziline varıp zeyl-i kitâbda mastûru’l-esâmi olan Müslimîn huzûrunda akd-i meclis-i şer‘-i hatîr etdikde merkūm Avanis meclis-i ma‘kūd-ı mezbûrda hâlâ zevcesi olan sâhibetü hâze’l-kitâb Melek bt. İsador nâm Ermeniye mahzarında tav‘an ikrâr ve i‘tirâf edip zikri âtî akdin sudûruna değin silk-i mülk-i sahîhimde münselik mülk ve hakkım olup mahalle-i mezbûrede vâki‘ bir tarafdan yine benim âhar mülk menzilime ve bir tarafdan Zaharya Halîfe nâm Ermeni mülküne ve bir tarafdan Mina bt. Muradça nâm Ermeniye mülküne ve bir tarafdan tarîk-ı âmma müntehî olup bir sagīr tahtânî odayı ve zât-ı eşcâr-ı müsmire ve gayr-ı müsmire hadîkayı müştemil olan cemî‘ mülk menzilimi kâffe-i hukūk ve merâfıkı ile zevcem merkūme Melek’e beş yüz kıt‘a riyâlî guruşa tarafeynden îcâb ve kabûlü hâvî bey‘-i bâtt-ı sahîh ile bey‘ ve teslîm edip ol dahi nefsi’çün iştirâ ve kabûl ve tesellüm ettikden sonra semen-i merkūm beş yüz riyâlî guruşun iki yüz riyâlî guruşu zevcem merkūme Melek’e cihet-i karz-ı şer‘îden zimmetimde deyn olan iki yüz riyâlî guruş hakkı ile takās edip meblağ-ı bâkī üç yüz riyâlî guruşdan zevcem merkūme Melek’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d cemî‘ menzil merkūme Melek’in mülk-i müşterâsıdır keyfemâ teşâ ve tahtâr mutasarrıfe olsun dedikde gıbbe’t-tasdîkı’ş-şer‘î vâki‘-i hâli mevlânâ-yı mezbûr mahallinde tahrîr ve ba‘dehû meclis-i şer‘-i hatîre gelip vukū‘u üzere ihbâr ve takrîr edicek mâ-hüve’l-vâki‘ bi’t-taleb ketb ve imlâ olunup merkūme Melek’in yedine def‘ ve i‘tâ olundu. Fi’l-yevmi’s-sâmin ve’l-ışrîn min-Şa‘bâni’l-mu‘azzam li-sene seb‘a ve sittîn ve elf. Şühûdü’l-hâl: Halil Çavuş b. Abdullah, Berber Üstâd Mahmud b. Bayezid, Sefer Beşe b. Abdullah, Attâr Hasan b. Abdullah, Ahmed b. Abdullah ve gayruhüm mine’l-[hâzırîn.]