Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 280 Hüküm no: 242 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Şaban Ağa b. Mehmed’in ölüm halindeyken kızı Fâtıma’ya menzilini hibe etmesinin geçersiz olduğu Fazîletlü efendi hazretlerinin imzâsıyladır. Mahmiye-i İstanbul’da Hoca Hayreddin mahallesinde sâkin iken bundan akdem vefât eden Şa‘ban Ağa b. Mehmed’in verâseti sulbiye sagīre kızı Fâtıma ile li-ebeveyn kız karındaşı Yemen nâm hâtuna münhasıra olduğu şer‘an mütehakkık oldukdan sonra mezbûre Yemen Hâtun meclis-i şer‘-i hatîrde bundan akdem sagīre-i mezbûrenin tesviye-i umûruna vasiyy-i muhtâr nasb olunup bi-hasebi’l-vesâye terekesine vâzı‘atü’l-yed olan Âişe nâm hâtun mahzarında üzerine da‘vâ [ve] takrîr-i kelâm edip müteveffâ-yı mezbûr Şa‘ban Ağa âkile marazına mübtelâ olup mesâlih yensâ bi-nefsihî görmeğe kādir değil iken mahalle-i mezbûrede vâki‘ bir tarafdan fahrü’l-akrân Âişe Sultân -dâmet ismetuhâ- kethüdâsı Ahmed Ağa b. ( ) mülküne ve bir tarafdan mahalle-i mezkûre imâmına meşrûta vakıf menzile ve bir tarafdan tarîk-ı âmma müntehî ve büyût-ı adîdeyi ve cüneyneyi hâvî mülk menzilimi sagīre-i mezbûreye hibe-i tâmme ile hibe edip ba‘dehû ol marazdan ifâkat bulmayıp fevt oldukda hibe-i mezbûrenin adem-i cevâzını binâen menzil-i mahdûd-ı mezbûrun nısf-ı âharı bi-tarîkı’l-usûbeti’n-nesebiyye bana âid olmuşken mezbûre Âişe Hâtun hibe-i mezbûre sahîha olmak zu‘muyla mecmû‘-ı menzile vaz‘-ı yed ve nısf-ı âharını bana teslîmden imtinâ‘ eder suâl olunup menzil-i mahdûdun nısf-ı âharından kasr-ı yedine tenbîh olunması matlûbumdur dedikde gıbbe’s-suâl mezbûre Âişe menzil-i mezkûra vech-i muharrer üzere vaz‘-ı yedini ikrâr ve lâkin mezbûr Şa‘ban Ağa’nın maraz-ı mezbûr ile marîz ve mesâlih yensâ bi-nefsihî görmeğe adem-i iktidârını inkâr etmeğin müdde‘iye-i mezbûreden sıdk-ı makālini mübeyyine beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Sarıgörez’de sâkin Ali Çelebi b. Ali ve Topkapısı dâhilinde sâkin el-Hâc Mahmud b. Abdullah li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Şa‘ban Ağa maraz-ı mezkûr ile marîz ve mesâlih yensâ bi-nefsihî görmeğe kādir değil iken menzil-i mahdûd-ı mezkûru sagīre-i mezbûreye hibe-i tâmme ile hibe ve ba‘dehû ol marazdan ifâkat bulmayıp vefât eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye etdikde ba‘de’t-ta‘dîl ve’t-tezkiye şehâdetleri makbûle olmağın ber-mûceb-i şehâdet-i mezbûre üzere hibe-i mezbûrenin butlânına hüküm ve menzil-i mahdûd-ı mezkûrun nısf-ı âharından mezbûre Âişe’nin kasr-ı yedine tenbîh olunup mâ-vaka‘a bi’l-ibtiğā ketb olundu. Hurrire fi’l-yevmi’l-ışrîn min şehri Ramazâni’l-mübârek li-sene seb‘a ve sittîn ve elf. Şühûdü’l-hâl: Süleyman Çelebi b. Mehmed, Mehmed Çelebi b. Mustafa, Ahmed Ağa b. Mehmed, Hüseyin Çelebi b. Salih, Ramazan Çelebi b. Ahmed, Maden Beşe b. Ahmed, Hasan Beşe b. Hızır, Mustafa Çelebi b. Mehmed, Mustafa Çelebi b. Ali.