Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 282 Hüküm no: 245 Orijinal metin no: [36a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Merhum Hacı Mehmed’in David v. Yasef’in zimmetinde kalan beş yüz guruş alacağının oğlu Salih Çelebi’ye ödenmesi Fazîletlü efendi hazretlerinin imzâsıyladır. Mahmiye-i İstanbul’da Hoşkadem mahallesinde sâkin iken bundan akdem vefât eden Hâcı Mehmed b. Hasan Çavuş’un sulbî kebîr oğlu ve bi’l-inhisâr verâseti olan işbu râfi‘ü’l-kitâb Salih Çelebi dîvân-ı ma‘delet-unvânda ma‘kūd Hanya cemâ‘atinden David v. Yasef nâm Yahudi muvâcehesinde üzerine bi’l-verâse takrîr-i da‘vâ edip babam müteveffâ-yı mezbûr hayâtda mezbûr David’e topu yüz otuz riyâlî guruşa olmak üzere beş yüz yirmi riyâlî guruşa dört top kılabdanlı âl dîmî dîbâyı bey‘ ve teslîm ol dahi iştirâ ve tesellüm eyledikden sonra semen-i mezbûru kable’l-ahz vefât etmekle meblağ-ı mezbûr bi-hasebi’l-irs bana intikāl eylemişdi hâlâ taleb ederin suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup mahmiye-i mezbûrede Karabaş mahallesinde sâkin fahrü’l-a‘yân Kenan Bey b. Abdüddeyyân ve İsmail Ağa Câmi‘-i şerîfinde müezzin olan Mehmed Halîfe b. Ali nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Hâcı Mehmed hayâtında mülkü olan dört top kılabdanlı âl dimi dîbâyı her topu yüz otuz riyâlî guruşa olmak üzere be-safka-i vâhide işbu David’e bizim huzûrumuzda beş yüz yirmi riyâlî guruşa bâtten bey‘ ve teslîm eyledi mezbûr David dahi iştirâ ve kabz eyledi biz bu husûsa bu vech üzere şâhidleriz şehâdet dahi ederiz deyu herbiri edâ-i şehâdet-i şer‘iyye eylediklerinde şâhidan-ı mezbûrân mahalleleri ahâlîsi Ramazan Efendi el-imâm ve Ahmed Efendi el-imâm ve Receb Çelebi ve es-Seyyid Mehmed Çelebi ve Süleyman ve Şa‘ban Efendi el-hatîb ve Hüseyin Dede el-kayyûm ve Mehmed Ali Efendi el-imâm ve Mustafa Beşe nâm kimesneler ile ta‘dîl ve tezkiye olduklarından sonra şehâdetleri makbûle olmağın ba‘de’t-tahlîfi’ş-şer‘î mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: İvaz Ağa ser-muhzırân, Mehmed Ağa b. Abdülmennân, Ali Beşe çukadâr, İsa Bey b. Ahmed, Hasan Çavuş el-mübâşir, Osman Beşe çukadâr ve gayruhüm mine’l-[hâzırîn.]