Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 283 Hüküm no: 246 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Yani v. Kiryazi’nin parasını aldıkları iddiasıyla ekmekçiler İsador ve Avanos kardeşler ile diğer Avanos aleyhine açtığı davada iddiasını ispat edemediği Mahmiye-i İstanbul hısnı ebvâbından Kumkapısı dâhilinde Nişancı mahallesinde sâkin kürkçü tâifesinden Yani v. Kiryazi nâm zimmî meclis-i şer‘-i hatîr-i lâzimü’t-tevkīrde yine mahmiye-i mezbûrede İbrahim Paşa Câmi‘-i şerîfi kurbünde İncirdibi demekle ma‘rûf mahalde vâki‘ ekmekçi dükkânında ekmekçi olan işbu hâmilû’s-sifr İsador ve Avanos veledey Perrin ve Avanos v. Akos nâm Ermeniler muvâcehelerinde üzerlerine da‘vâ ve takrîr-i kelâm edip târih-i kitâb günü mezbûrûndan ekmek iştirâ eylediğimde bir kîse içinde dört bin akçemi mezbûrûnun yanlarında vaz‘ etmekle meblağ-ı mezbûru mesfûrûn ahz eylemişlerdir suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan sıdk-ı makāline beyyine taleb olundukda ityân-ı beyyineden izhâr-ı acz, istihlâf eyledikde mesfûrûn İsador ve Avanos ve diğer Avanos’dan herbirine müdde‘î-i mezbûrun vech-i muharrer üzere ve dört bin akçesini ahz eylemediklerine ve minvâl üzere meblağ-ı mezbûr dört bin akçenin müdde‘î-i mezbûr üzerlerine red lâzım olmadığına yemîn teklîf olundukda herbiri alâ vefki’l-mes’ûl yemîn billâhi’l-lezî enzele’l-İncîle alâ İsa aleyhisselâm eylediklerinde müdde‘î-i mezbûr ityân-ı beyyine etmedikçe bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Halil Çavuş b. Osman el-mübâşir, Mehmed Çelebi b. Haydar, Osman Beşe çukadâr, İsa Bey b. Ahmed ve gayruhüm mine’l-[hâzırîn.]