Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 289 Hüküm no: 250 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zekeriya Çelebi, Neslihan Hatun ve Hacer bt. İbrahim’e kefaletlerinden dolayı İstanbul eski kadısı Ahmed Efendi’ye olan borçları için beş ay süre verildiği Fazîletlü efendi hazretlerinin imzâsıyladır. Dâru’l-hilâfeti’l-aliyye Kostantıniyye el-mahmiyyede Şeyh Ebû’l-Vefâ kurbünde Safr[a] Bayezid mahallesi sükkânından Zekeriya Çelebi ve Neslihan Hâtun ibney Hâcı Hüsrev ve Hacer bt. İbrahim nâm hâtun meclis-i şer‘-i hatîrde sâbıkā İstanbul kādısı olup işbu kitâb-ı sıhhat-nisâb yed-i kerîmelerine vusûl ile şeref-yâb olan a‘lemü’l-ulemâ’i’l-izâm ekmelü’t-fuzalâ’i’l-kirâm yenbû‘u’l-fezâil menbû‘u’l-efâzil câmi‘u’-fürû‘ ve’l-usûl hâvî’l-ma‘kūl ve’l-menkūl Ahmed Efendi mahzarında herbiri tav‘an ikrâr ve i‘tirâf edip mûmâ-ileyh Ahmed Efendi hazretlerinin gāib ani’l-meclis Süleyman Ağa b. İbrahim zimmetinde cihet-i karz-ı şer‘îden yedi bin yüz kıt‘a riyâlî kebîr guruş hakkı olmağla mecmû‘-ı meblağ-ı mezbûra cümlemiz emr ve kabûlü hâviye kefâletle kefîl bi’l-mâl olduğumuzdan sonra medyûn-ı mezkûr Süleyman Ağa silk-i mülkünde münselik olup mahalle-i mezbûrede vâki‘ ma‘lûmü’l-hudûd mülk menzilini deyni olan meblağ-ı mezbûr yedi bin yüz guruşun dört bin beş yüz riyâlî guruşuna tuta verdiğinden gayrı bin riyâlî guruş dahi irsâl edip ol vechile mûmâ-ileyh Ahmed Efendi beş bin beş yüz riyâlî guruşu istîfâ etmekle bin altı yüz kıt‘a riyâlî guruş hakkı bâkī kalmağla meblağ-ı bâkī-i mezbûr bin altı yüz riyâlî guruşu bi-hükmi’l-kefâle bizden taleb ve da‘vâ edip isti‘câl eylediğimizde mûmâ-ileyh Ahmed Efendi târih-i kitâb gününden beş ay tamâmına değin meblağ-ı bâkī-i mezbûr bin altı yüz riyâlî guruşu bize te’cîl edip biz dahi ecel-i mezkûru kabûl eyledik ba‘de hulûli’l-ecel meblağ-ı mekfûlün-bih-i mezkûr bin altı yüz riyâlî guruşu mûmâ-ileyh efendiye zimmetimizde bi-hükmi’l-kefâle edâsı vâcib deynimizdir dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâdis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Es-seyyid Mehmed Efendi b. es-Seyyid Sinan, Fahrü’l-müderrisîni’l-kirâm Ahmed Efendi b. Abdurrahman, Derviş Ömer Efendi b. İbrahim el-kādî, Süleyman Efendi b. Hüseyin, Osman Çavuş b. Ali, Beyzâde Mehmed Efendi, İvaz Efendi, İvaz Ağa b. Hasan, İbrahim Efendi b. Şa‘ban, Hüseyin Çavuş b. Abdullah, İsa Bey b. Ahmed ve gayruhüm.