Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 290 Hüküm no: 252 Orijinal metin no: [37a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çocuksuz vefat eden Mano v. İstati’nin ticarî ortağı Yorgi v. Ander’de olan alacağının beytülmal tarafından tahsilinde çıkan anlaşmazlıkta iki bin dört yüz akçe üzerine sulh olunduğu Mahmiye-i İstanbul’da bi’l-fi‘il gümrük ve beytü’l-mâl-ı âmme ve hâslar emîni olan umdetü’l-a‘yân Siyavuş Ağa b. Abdullah tarafından husûs-ı âti’z-zikri ikrâra vekîl olup nehc-i şer‘î ve tarîk-ı mu‘teber-i mer‘î üzere şer‘an vekâleti sâbite olan zahrü’l-emsâl Hüseyin Ağa b. Abdullah meclis-i şer‘-i hatîrde işbu râfi‘ü’s-sifr Yorgi v. Ander nâm zimmî muvâcehesinde bi’l-vekâle ikrâr ve takrîr-i kelâm edip mahmiye-i mezbûrede Ayakapısı hâricinde vâki‘ Ahmed Çelebi mahallesinde sâkin olup bundan akdem hâlik olan Mano v. İstati nâm zimmînin zâhirde vâris-i ma‘rûfu [olmayıp] terekesi cânib-i beytü’l-mâle âid ve râci‘ olmağın müvekkilim mezbûr Siyavuş Ağa merkūm Yorgi’den hâlik Mano hayâtında seninle mumculuk san‘atında şerîkler olmağla ba‘de helâkihî re’s-i mâlından senin yedinde yetmiş bin akçesi kalıp hâlâ beytü’l-mâle âid olmuşdur deyu meblağ-ı mezbûr yetmiş bin akçeyi mezbûr Yorgi’den da‘vâ ve taleb eyledikde ol dahi cevâbında fi’l-vâki‘ hâlik-i mezbûr ile ben hayâtında san‘at-i mezbûrede şerîkler olup kable’l-helâk benimle fesh-i akd-i şirket ve yedimde olan re’s-i mâlını ve zaman-ı şirketde hâsıl olup hissesine âid olan fâidesini tamâmen benden ahz u kabz ve zimmetimi ibrâ edip yedime hüccet-i şer‘iyye vermişidi deyu def‘le mukābile etmekle beynlerinde münâza‘ât-ı kesîre vâkı‘a olmuşidi el-hâletü hâzihî beynlerinde muslihûn tavassut edip da‘vâ-yı mezbûreden müvekkil-i mezbûru iki bin dört yüz akçe üzerine sulh eylediklerinde ol dahi sulh-ı mezbûru kabûl ve bedel-i sulh olan meblağ-ı mezbûr iki bin dört yüz akçeyi tamâmen mezbûr Yorgi yedinden ahz u kabz edip husûs-ı mezbûra müte‘allika cemî‘ de‘âvî ve mutâlebât ve eymân ve muhâsamâtdan zimmetini ibrâ-i âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’l-yevmi’s-sâmin aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Durmuş Ağa b. Şehâbeddin, Mustafa Ağa b. Mehmed, Osman Beşe çukadâr, İsa Bey b. Ahmed, Mehmed b. Habib, Mehmed Çelebi b. Haydar ve gayruhüm mine’l-[hâzırîn.]