Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 291 Hüküm no: 253 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebûbekir Çelebi b. Hasan’ın arsası vakıf mülk menzilini Ali Çelebi b. Mehmed’e on yedi bin akçeye sattığı Fazîletlü efendi hazretlerinin imzâsıyladır. Mahmiye-i İstanbul hısnı ebvâbından Edirnekapısı dâhilinde Seyyid Muharrem mahallesinde sâkin Ebûbekir Çelebi b. Hasan meclis-i hatîrde işbu râfi‘ü’l-kitâb Ali Çelebi b. Mehmed mahzarında ikrâr ve i‘tirâf edip silk-i mülkümde münselik olup arsasının senede merhûm Seyyid Muharrem Vakfı’na altı akçe mukāta‘ası olan mahalle-i mezbûrede vâki‘ bir tarafı Nişancı Mustafa Beşe menziline ve bir tarafı Bakkal Ali Çelebi menziline ve bir tarafı mezkûr Ali Çelebi b. Mehmed menziline ve bir tarafı tarîk-ı âmma müntehî fevkānî bir bâb oda ve tahtânî bir bâb oda ve bir tahta-pûş ve kenîfi hâvî mülk menzilimi cemî‘ hudûd ve hukūk ve müştemilâtı ile mezkûr Ali Çelebi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile on yedi bin fıddî râyic fi’l-vakt akçeye bey‘ ve teslîm edip mezkûr Ali Çelebi dahi vech-i muharrer üzere iştirâ ve tesellüm ve kabûl ve kabz eyledikden sonra semeni olan meblağ-ı mezbûr on yedi bin akçeyi tamâmen yedinden ahz u kabz edip ba‘de’l-yevm menzil-i mahdûd-ı mezkûr müşterî-i mezkûrun mülk-i müşterâsıdır keyfe mâ yeşâ mutasarrıf olsun dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’l-hâmis aşer min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Balcı Mehmed Beşe, Üstâd Mehmed Beşe, Osman Çelebi, Hasan Bey, Halil Bey b. ( ), Ali Çelebi b. ( ), Osman Beşe b. ( )