Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 300 Hüküm no: 266 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arzi bt. Yolcu’nun kocası Hacı Kaya’nın mirasındaki sekizde bir hissesi hususunda merhumun oğlu Hacı Mehmed’in zimmetini ibra ettiği Dâru’l-hilâfeti’l-aliyye Kostantıniyye el-mahmiyye mahallâtından Üskübî mahallesinde sâkin iken bundan akdem vefât eden el-Hâc Kaya b. İbrahim nâm kimesnenin verâseti zevce-i metrûkesi Arzi bt. Yolcu nâm hâtuna ve sulbî kebîr oğlu el-Hâc Mehmed’e ve sulbiye kebîre kızı Zeyni nâm hâtuna münhasıra olduğu şer‘an zâhir ve müte‘ayyin oldukdan sonra mezbûre Arzi Hâtun meclis-i şer‘-i hatîr-i lâzimü’t-tevkīrde işbu râfi‘ü’r-rakīm mezbûr el-Hâc Ahmed (Mehmed) mahzarında tâyi‘aten ikrâr ve takrîr-i kelâm edip zevcim mezbûr el-Hâc Kaya vefât eyledikde terekesine oğlu mezbûr el-Hâc Mehmed vaz‘-ı yed etmekle müteveffâ-yı mezbûr zimmetinde mütekarrir ve ma‘kūdün-aleyh olan beş bin akçe mehr-i müeccelimi tamâmen oğlu mezbûr el-Hâc Mehmed yedinden ahz u kabz eylediğimden sonra terekesinden dahi sümün hisse-i şer‘iyyemi mezbûr el-Hâc Mehmed’den da‘vâ ve taleb eylediğimde beynimizde münâza‘ât-ı kesîre cereyânından sonra tavassut-ı muslihîn ile mezbûr el-Hâc Mehmed tereke-i müteveffâ-yı mezbûrdan bana isâbet eden sümün hisse-i şer‘iyyem mukābilesinde beni dokuz bin nakid akçe ve iki beledî döşek ve iki yorgan ve iki kebe ve bir kaliçe ve bir tencere ve üç sahan ve bir kilim üzerlerine sulh eyledikde ben dahi sulh-ı mezbûru kabûl ve bedel-i sulh olan meblağ-ı mezbûr dokuz bin akçe ile eşyâ-yı mezbûreyi tamâmen tereke-i müteveffâ-yı mezbûra vaz‘-ı yed eden mezbûr el-Hâc Mehmed yedinden ahz u kabz edip zevcim müteveffâ-yı mezbûrun ile’l-vefât yedinde ve taht-ı tasarrufunda olup mahmiye-i mezbûre hısnı ebvâbından Odunkapısı dâhilinde vâki‘ arsasının ve senede Çaker Ağa Vakfı’na elli akçe mukāta‘ası olan binâsı mülk iki bâb kundakçı dükkânlarının sende olan sümün hisse-i şer‘iyyemden gayrı tereke-i müteveffâ-yı mezbûrdan bana isâbet eden sümün hisse-i şer‘iyyeme müte‘allika cemî‘ da‘vâ ve mutâlebât ve eymân ve muhâsamâtdan mezbûr el-Hâc Mehmed’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim min ba‘d mezbûr el-Hâc Mehmed kıbelinde bir akçe ve bir habbe hakkım bâkī kalmadı eğer ba‘de’l-yevm tereke-i müteveffâ-yı mezbûra müte‘allika da‘vâ benden mezbûr el-Hâc Mehmed üzerine sudûr ederse lede’l-hükkâmi’l-kirâm mesmû‘a ve makbûle olmaya dedikde gıbbe’t-tasdîkı’l-mu‘teber mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Mustafa Efendi b. Muharrem, Osman Beşe çukadâr, Mehmed Çelebi b. Haydar, el-Hâc İskender b. ( ) ve gayruhüm mine’l-[hâzırîn.]