Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 302 Hüküm no: 268 Orijinal metin no: [39a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirakos v. Todores’in Kayıkçı Hüseyin b. Mustafa’dan beş yüz akçe alacağı olduğu Mahmiye-i Galata hâricinde Santa Marka mahallesinde sâkin işbu hâmilü’s-sifr Kirakos v. Todores nâm Ermeni meclis-i şer‘-i hatîr-i lâzimü’t-tevkīrde mahrûse-i Üsküdar’da Sultândepesi nâm mevzi‘de sâkin kayıkçı tâifesinden Hüseyin b. Mustafa nâm kimesne mahzarında üzerine da‘vâ ve takrîr-i kelâm edip mezbûr Hüseyin zimmetinde cihet-i karz-ı şer‘îden bin beş yüz akçe hakkım vardır suâl olunup alıverilmesi matlûbumdur dedikde gıbbe’s-[suâl] mezbûr Hüseyin cevâbında fi’l-hakīka müdde‘î-i mezbûr cihet-i merkūmeden zimmetimde lâzimü’l-edâ ve vâcibü’l-kazâ bin beş yüz akçe deynim vardır deyu tav‘an ikrâr ve i‘tirâf etmeğin mûcibiyle meblağ-ı mezbûr bin beş yüz akçeyi müdde‘î-i mezbûra edâ ve teslîme mukırr-ı mezbûr Hüseyin’e tenbîh birle mâ-hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Hüseyin Bey b. Veli, Abdi Bey b. ( ) el-câbî, Veli b. Mansur, Osman Beşe çukadâr, İsa Bey b. Ahmed, Mehmed Çelebi b. Haydar ve gayruhüm.