Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 302 Hüküm no: 269 Orijinal metin no: [39a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Bünyan v. Kir’in sattığı emtia bedelinden Serkis v. Sefer’den iki yüz elli buçuk guruş alacağı olduğu Tüccâr tâifesinden işbu bâ‘isü’l-vesîka Bünyan v. Kir nâm Ermeni meclis-i şer‘-i hatîrde mahmiye-i İstanbul’da Lanka kurbünde İnebey mahallesinde sâkin Serkis v. Sefer nâm Ermeni muvâcehesinde üzerine takrîr-i da‘vâ edip bundan akdem mezkûr Serkis yedimden iştirâ ve kabz eylediği emti‘a-i mütenevvi‘a semeninden beş yüz kırk sekiz buçuk kıt‘a riyâlî guruş hakkım olup meblağ-ı mezkûrdan iki yüz doksan sekiz kıt‘a riyâlî guruş mezkûr Serkis yedinden ahz u kabz eyledim bâkī iki yüz elli buçuk kıt‘a riyâlî guruş hakkım olup edâda ta‘annüd eder hâlâ suâl olunup alıverilmesini taleb ederim dedikde gıbbe’s-suâl mezkûr Serkis cevâbında fi’l-hakīka müdde‘î-i mezbûr Bünyan’a vech-i muharrer üzere beş yüz kırk sekiz buçuk riyâlî guruş deynimiz olup lâkin meblağ-ı mezkûrdan üç yüz seksen sekiz buçuk kıt‘a riyâlî guruşunu bundan akdem kendiye def‘ ve teslîm eyledim ancak yüz altmış kıt‘a riyâlî guruş deynim bâkī kalmışdır deyu ziyâdeyi inkâr edicek mezkûr Serkis’den def‘-i meşrûhunu mübeyyine beyyine taleb olundukda ityân-ı beyyineden izhâr-ı acz ile istihlâf edicek müdde‘î-i mezkûr Bünyan’a ikrârı mertebesi olan iki yüz doksan sekiz guruşdan ziyâde kabz etmediğine mezkûr Bünyan’a yemîn teklîf olundukda ol dahi hasbe’l-mes’ûl yemîn billâhi’l-lezî enzele’l-İncîle alâ İsa aleyhisselâm ettikden sonra meblağ-ı bâkī-i mezkûr iki yüz elli buçuk kıt‘a riyâlî guruşu müdde‘î-i mezkûr Bünyan’a edâya [39b] tenbîh olunup mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-Şevvâli’l-mükerrem li-sene seb‘a ve sittîn ve elf. Şühûdü’l-hâl: Osman Beşe çukadâr, Mehmed Çelebi b. Haydar, Mustafa Efendi el-kâtib, İsa Bey b. Ahmed, Mustafa Efendi b. Muharrem.