Rumeli Sadâreti Mahkemesi 106 Numaralı Sicil (H. 1067-1069 / M. 1656-1658) cilt: 50, sayfa: 315 Hüküm no: 287 Orijinal metin no: [41a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Muslı Beşe’nin sattığı cariye bedelinden Mehmed b. Osman’dan yüz otuz beş guruş alacağı olduğu Esirci tâifesinden işbu sâhibü’l-kitâb Muslı Beşe b. Mehmed mahfil-i kazâda tâife-i mezbûreden Mehmed b. Osman nâm kimesne mahzarında üzerine takrîr-i da‘vâ edip mezbûr Mehmed’e işbu açık kaşlı göğ elâ gözlü orta boylu Rusiyyetü’l-asl Molade câriyemi târih-i kitâbdan yedi gün mukaddem üç (...) değin muhayyer olmak üzere yüz otuz beş kıt‘a riyâlî guruşa bâtten bey‘ ve teslîm edip ol dahi minvâl-i muharrer üzere iştirâ ve kabûl ve tesellüm eylemişidi hâlâ müddet-i hıyâr münkaziye olmuşiken semen-i mezkûru edâda ta‘annüd eder suâl olunup alıverilmesin taleb ederim dedikde gıbbe’s-suâl mezbûr Mehmed cevâbında fi’l-hakīka câriye-i mezkûreyi târih-i kitâbdtan yedi [gün] mukaddem müdde‘î-i mezkûr Muslı Beşe’den muhayyer olmak üzere yüz otuz beş kıt‘a riyâlî guruşa iştirâ ve kabz edip müddet-i hıyâr dahi münkaziye olduğunu ikrâr ve i‘tirâf etmeğin ikrârı mûcebince semen-i mezbûr yüz otuz beş kıt‘a riyâlî guruşu müdde‘î-i mezkûra edâya mezbûr Mehmed’e tenbîh olunup mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min-Şevvâli’l-mükerrem li-sene seb‘a ve sittîn ve elf. Şühûdü’l-hâl: El-hâc Mustafa b. Abdullah kethüdâ, Halil Çavuş b. Osman, Murad b. Mustafa, Osman Çavuş b. Ahmed, Osman Beşe çukadâr, İsa Bey b. Ahmed ve gayruhüm mine’l-[hâzırîn.]